home
corpus
author
msName
people
places
Advanced Search
Search icon
Life of Pisentius part 1
normalized analytic TEI ANNIS PAULA Search ANNIS
Next

Normalized Text

ⲡⲃⲓⲟⲥⲁⲩⲱⲧⲡⲟⲗⲓⲧⲉⲓⲁⲙⲡⲉⲛⲡⲉⲧⲟⲩⲁⲁⲃⲛⲉⲓⲱⲧⲉⲧⲧⲁⲓⲏⲩⲁⲡⲁⲡⲉⲥⲉⲛⲑⲓⲟⲥⲡⲉⲡⲓⲥⲕⲟⲡⲟⲥⲁⲩⲱⲡⲁⲛⲁⲭⲱⲣⲏⲧⲏⲥ·ⲙⲡⲧⲟⲟⲩⲛⲧⲥⲉⲛϯⲉⲁϥϩⲓⲥⲧⲟⲣⲓⲍⲉⲙⲙⲟϥⲛϭⲓⲓⲱϩⲁⲛⲛⲏⲥⲡⲉⲡⲣⲉⲥⲃⲩⲧⲉⲣⲟⲥⲙⲡⲉϩⲟⲟⲩⲙⲡⲉϥⲣⲡⲙⲉⲉⲩⲉⲉⲧⲟⲩⲁⲁⲃⲉⲧⲉⲥⲟⲩⲙⲛⲧϣⲟⲙⲧⲉⲡⲉⲙⲡⲉⲃⲟⲧⲉⲡⲏⲡϩⲛⲟⲩⲉⲓⲣⲏⲛⲏⲛⲧⲉⲡⲛⲟⲩⲧⲉϩⲁⲙⲏⲛ·─────···─────···─────···─────
ⲡϩⲩⲡⲟⲑⲉⲥⲓⲥⲙⲡⲓϣⲁⲙⲉϩⲛⲣⲁϣⲉϩⲙⲡⲉϩⲟⲟⲩⲙⲡⲉⲛⲉⲓⲱⲧⲉⲧⲟⲩⲁⲁⲃⲡⲉⲧⲫⲟⲣⲉⲓⲙⲡⲉⲭⲣⲓⲥⲧⲟⲥⲁⲡⲁⲡⲉⲥⲩⲛⲑⲓⲟⲥ·ⲡⲁⲓⲉⲧⲙⲉϩⲛⲟⲩⲟⲉⲓⲛⲉϥϣⲉϣⲥϯⲛⲟⲩϥⲉⲉⲃⲟⲗⲛⲟⲩⲟⲉⲓϣⲛⲓⲙ·ⲟⲩⲙⲟⲛⲟⲛϫⲉⲡⲉϩⲟⲟⲩⲁⲗⲗⲁⲧⲉⲩϣⲏ⁛
ⲛⲧⲃⲛⲟⲟⲩⲉⲧⲏⲣⲟⲩⲙⲡⲕⲁϩⲙⲛⲛϩⲁⲗⲁⲁⲧⲉⲛⲧⲡⲉⲥⲉⲉⲩⲫⲣⲁⲛⲉⲙⲙⲟⲟⲩⲉⲩⲥⲕⲓⲣⲧⲁⲁⲩⲱⲉⲩⲧⲉⲗⲏⲗϩⲙⲡⲉϩⲟⲟⲩⲙⲡⲉϥϣⲙⲛⲟⲩϥⲉⲉⲧⲧⲁⲓⲏⲩ·ⲡⲁⲓⲛⲧⲁϥⲧⲁϩⲟⲟⲩⲕⲁⲧⲁⲧϩⲉⲉⲧⲉⲣⲉⲡϣⲁϫⲉⲛⲁⲧⲁⲙⲟⲛⲉⲛϣⲁⲛⲙⲟⲟϣⲉⲉⲧϩⲏ⁛—
ⲁⲓⲱⲣⲕⲉⲧⲣⲉⲁⲕⲁⲣⲱⲓⲉⲧⲙϣⲁϫⲉⲉⲛⲉⲕⲕⲁⲧⲟⲣⲑⲱⲙⲁ·ⲉⲃⲟⲗϫⲉⲉⲕⲡⲏⲧⲉⲃⲟⲗⲙⲡⲉⲟⲟⲩ·ⲛⲛⲣⲱⲙⲉϫⲓⲛⲧⲁⲣⲭⲏⲛⲧⲁⲕⲣⲙⲟⲛⲁⲭⲟⲥⲙⲡⲁⲧⲕⲣⲉⲡⲓⲥⲕⲟⲡⲟⲥ·
ⲁⲩⲱϩⲛⲟⲩⲙⲉⲉⲛϣⲁⲛⲥⲱⲟⲩϩⲧⲏⲣⲛⲡⲟⲩⲁⲡⲟⲩⲁⲉⲟⲩⲛⲧⲁϥⲙⲙⲁⲩⲛⲟⲩⲡⲣⲟⲫⲏϯⲁ·ⲕⲉⲟⲩⲁⲉⲟⲩⲛⲧⲁϥⲙⲙⲁⲩⲛⲟⲩⲥⲟⲟⲩⲛ·ⲕⲉⲟⲩⲁⲟⲛⲛⲟⲩⲇⲓⲁⲕⲣⲓⲥⲓⲥ·ⲕⲉⲟⲩⲁⲉⲟⲩⲛⲧⲁϥⲙⲙⲁⲩⲛⲟⲩϭⲱⲗⲡⲉⲃⲟⲗ·ϩⲱⲥⲧⲉⲛⲥⲉϣⲱⲡⲉⲧⲏⲣⲟⲩϩⲛⲟⲩⲧⲥⲁⲛⲟ⁛—
ⲡⲡⲉⲧⲟⲩⲁⲁⲃⲇⲉⲓⲁⲕⲱⲃⲟⲥⲡⲁⲡⲟⲥⲧⲟⲗⲟⲥⲱϣⲉⲃⲟⲗϩⲛⲧⲉϥⲉⲡⲓⲥⲧⲟⲗⲏⲛⲕⲁⲑⲟⲗⲓⲕⲟⲛϫⲉⲡⲉⲧⲥⲟⲟⲩⲛⲛⲉⲓⲣⲉⲙⲡⲡⲉⲧⲛⲁⲛⲟⲩϥⲛϥⲉⲓⲣⲉⲙⲙⲟϥⲁⲛⲟⲩⲛⲟⲃⲉⲛⲁϥⲡⲉ⁛—
ⲙⲁⲣⲛⲉⲓⲙⲉϫⲉⲛⲓⲙⲡⲉⲧⲉⲣⲉⲡϩⲓⲉⲣⲟⲥⲛⲁⲡⲟⲥⲧⲟⲗⲟⲥϣⲁϫⲉⲉⲣⲟϥϫⲉϯⲥⲟⲟⲩⲛⲛⲟⲩⲣⲱⲙⲉϩⲙⲡⲉⲭⲣⲓⲥⲧⲟⲥϩⲁⲧϩⲏⲙⲙⲛⲧⲁϥⲧⲉⲛⲣⲟⲙⲡⲉ·
ⲉⲓⲧⲉⲉϥϩⲙⲡⲥⲱⲙⲁⲛϯⲥⲟⲟⲩⲛⲁⲛⲉⲓⲧⲉⲉϥⲙⲡⲃⲟⲗⲙⲡⲥⲱⲙⲁⲛϯⲥⲟⲟⲩⲛⲁⲛⲡⲛⲟⲩⲧⲉⲡⲉⲧⲥⲟⲟⲩⲛϫⲉⲁⲩⲧⲱⲣⲡⲙⲡⲁⲓⲛϯⲙⲓⲛⲉϣⲁⲧⲙⲉϩϣⲟⲙⲧⲉⲙⲡⲉ·
ⲁⲩⲱϯⲥⲟⲟⲩⲛⲙⲡⲉⲓⲣⲱⲙⲉⲛϯⲙⲓⲛⲉⲉⲓⲧⲉⲉϥϩⲙⲡⲥⲱⲙⲁ·ⲉⲓⲧⲉⲉϥⲙⲡⲃⲟⲗⲙⲡⲥⲱⲙⲁⲛϯⲥⲟⲟⲩⲛⲁⲛⲡⲛⲟⲩⲧⲉⲡⲉⲧⲥⲟⲟⲩⲛϫⲉⲁⲩⲧⲟⲣⲡϥⲉⲡⲡⲁⲣⲁⲇⲓⲥⲟⲥⲁϥⲥⲱⲧⲙⲉϩⲉⲛϣⲁϫⲉⲉⲩϩⲏⲡ·
ⲛⲁⲓⲉⲧⲉⲛⲥⲧⲟⲁⲛⲉϫⲟⲟⲩⲉⲣⲱⲙⲉ⁛—
ⲛⲓⲙϭⲉⲡⲉⲧⲉⲣⲉⲡⲁⲡⲟⲥⲧⲟⲗⲟⲥϣⲁϫⲉⲉⲣⲟϥⲉⲓⲙⲏⲧⲓⲛⲧⲟϥⲙⲁⲩⲁⲁϥ·
ⲉⲡⲉⲓⲇⲏⲛⲉⲧⲟⲩⲁⲁⲃⲧⲏⲣⲟⲩⲡⲏⲧⲉⲃⲟⲗⲙⲡⲉⲟⲟⲩⲙⲡⲉⲓⲕⲟⲥⲙⲟⲥ·ⲧⲁⲓϩⲱⲱϥⲧⲉⲧϩⲉⲙⲡⲉⲛⲉⲓⲱⲧⲉⲧⲧⲁⲓⲏⲩⲁⲡⲁⲡⲉⲥⲩⲛⲑⲓⲟⲥⲡⲁⲓⲛⲧⲁⲡⲛⲟⲩⲧⲉⲟⲩⲟⲛϩϥⲛⲁⲛⲉⲃⲟⲗϩⲛⲛⲉⲛϩⲟⲟⲩ
ⲉϥⲟⲛⲣⲉϥⲣⲟⲩⲟⲉⲓⲛⲙⲡⲕⲟⲥⲙⲟⲥⲧⲏⲣϥ
ⲉϥⲟⲛϩⲙⲟⲩⲉϥϫⲱⲕⲣⲛⲟⲩⲟⲛⲛⲓⲙⲕⲁⲧⲁⲡⲉⲧⲥⲏϩϩⲙⲡⲉⲩⲁⲅⲅⲉⲗⲓⲟⲛϫⲉⲛⲧⲱⲧⲛⲡⲉⲡⲉϩⲙⲟⲩⲙⲡⲕⲁϩ·
ⲉⲣϣⲁⲛⲡⲉϩⲙⲟⲩⲇⲉⲃⲁⲃⲉⲉⲩⲛⲁⲙⲟⲗϩϥϩⲛⲟⲩ·
ⲁⲩⲱⲟⲛϫⲉⲛⲧⲱⲧⲛⲡⲉⲡⲟⲩⲟⲉⲓⲛⲙⲡⲕⲟⲥⲙⲟⲥ·
ⲉϥϩⲱⲡⲛⲛⲉϥⲡⲟⲗⲓⲧⲉⲓⲁ·ⲉⲣⲉⲡⲛⲟⲩⲧⲉⲟⲩⲱⲛϩⲙⲙⲟⲟⲩⲉⲃⲟⲗⲕⲁⲧⲁⲅⲉⲛⲉⲁ·ⲛⲛⲉⲧⲉⲓⲣⲉⲙⲡⲉϥⲟⲩⲱϣⲙⲛⲛⲉϥⲉⲛⲧⲟⲗⲏ⁛—ⲕⲁⲧⲁⲧϩⲉⲉⲧⲥⲏϩ
ϫⲉⲡϫⲟⲉⲓⲥϩⲏⲛⲉϩⲟⲩⲛⲉⲟⲩⲟⲛⲛⲓⲙⲉⲧⲱϣⲉϩⲣⲁⲓⲉⲣⲟϥϩⲛⲟⲩⲙⲉϥⲛⲁⲣⲡⲟⲩⲱϣⲛⲟⲩⲟⲛⲛⲓⲙⲉⲧⲣϩⲟⲧⲉϩⲏⲧϥ·ⲁⲩⲱϥⲛⲁⲥⲱⲧⲙⲉⲡⲉⲩⲥⲟⲡⲥⲡⲛϥⲧⲟⲩϫⲟⲟⲩ⁛—
ⲧⲉⲧⲛⲟⲩⲱϣϭⲉⲉⲉⲓⲙⲉϫⲉⲉϥⲙⲟⲥⲧⲉⲙⲡⲉⲟⲟⲩⲉⲧϣⲟⲩⲉⲓⲧ·ⲁⲩⲱϫⲉⲛϥⲟⲩⲱϣⲁⲛⲉⲧⲣⲉⲗⲁⲁⲩ·ⲃⲱⲕⲉⲡⲧⲁⲕⲟⲏⲉⲉⲓⲙⲉⲉⲣⲟϥϩⲛⲛⲉϥⲡⲟⲗⲓⲧⲉⲓⲁⲉⲧϥⲉⲓⲣⲉⲙⲙⲟⲟⲩ⁛—
ⲥⲱⲧⲙϭⲉϩⲛⲟⲩϯϩⲧⲏϥ·
ⲁⲥϣⲱⲡⲉⲇⲉⲛⲟⲩϩⲟⲟⲩⲉⲧⲓⲉϥⲟⲙⲙⲟⲛⲁⲭⲟⲥⲙⲡⲁⲧⲉⲡⲛⲟⲩⲧⲉⲧⲁϩⲙϥⲉⲧⲙⲛⲧⲉⲡⲓⲥⲕⲟⲡⲟⲥ·ⲛⲉϥⲥϭⲣⲁϩⲧⲙⲁⲩⲁⲁϥϩⲙⲡⲧⲟⲟⲩⲛⲧⲥⲉⲛⲧⲏ·
ⲁⲡⲉϥⲥⲟⲛⲉⲓϣⲁⲣⲟϥⲉⲧⲣⲉϥϭⲙⲡⲉϥϣⲓⲛⲉ·ⲉϥⲙⲟⲟϣⲉⲙⲛⲟⲩⲥⲟⲛⲙⲡⲓⲥⲧⲟⲥ·ⲁⲩⲁⲡⲁⲛⲧⲁⲉⲡⲡⲉⲧⲟⲩⲁⲁⲃⲛⲁⲥⲕⲏⲧⲏⲥ·ⲁⲩⲱⲁⲩϫⲓⲥⲙⲟⲩϩⲛⲛⲉϥϭⲓϫⲉⲧⲟⲩⲁⲁⲃ·
ⲁϥϫⲛⲟⲟⲩⲇⲉϫⲉⲟⲩⲛⲧⲏⲧⲛⲁⲡⲟⲕⲣⲏⲥⲓⲥϩⲛⲛⲉⲓⲙⲉⲣⲟⲥ·
ⲁⲩⲟⲩⲱϣⲃϫⲉⲡⲣⲱⲧⲟⲛⲙⲉⲛⲛⲧⲁⲛⲕⲁⲣⲁⲧⲛⲉⲃⲟⲗⲉⲧⲣⲉⲛⲉⲓϣⲁⲣⲟⲕⲛⲧⲛϭⲙⲡⲉⲕϣⲓⲛⲉ·ⲁⲩⲱⲛⲧⲛϫⲓⲙⲡⲉⲕⲥⲙⲟⲩ
ϫⲉⲙⲡⲉⲛⲣⲟⲟⲩϣⲙⲡⲕⲟⲥⲙⲟⲥ·ⲕⲁⲛⲉⲡⲁⲣⲁⲅⲉⲙⲙⲟⲕ·ⲉⲓⲥⲟⲩⲙⲏⲏϣⲉⲛϩⲟⲟⲩ⁛—
ⲙⲛⲛⲥⲱⲥⲟⲩⲛⲧⲁⲛⲙⲙⲁⲩⲛⲟⲩⲕⲟⲩⲓⲛⲁⲡⲟⲕⲣⲓⲥⲓⲥ·ϩⲙⲡⲓⲧⲟϣⲉⲛⲟⲩⲱϣⲉⲧⲟϣⲥ·ⲁⲗⲗⲁϣⲗⲏⲗⲉϫⲱⲛⲡⲉⲛⲉⲓⲱⲧⲛⲧⲉⲡⲛⲟⲩⲧⲉⲙⲟⲟϣⲉⲛⲙⲙⲁⲛ·
ⲉⲣϣⲁⲛⲡⲛⲟⲩⲧⲉϯⲧϩⲉⲛⲁⲛ·ⲧⲛⲛⲁⲕⲧⲟⲛϣⲁⲣⲟⲕⲛⲕⲉⲥⲟⲡⲛⲧⲛⲁⲥⲡⲁⲍⲉⲙⲙⲟⲕⲛⲧⲛϫⲓⲙⲡⲉⲕⲥⲙⲟⲩⲙⲡⲁⲧⲛⲕⲧⲟⲛⲉⲡⲉⲛⲏⲓ·ⲉϣⲱⲡⲉⲡⲟⲩⲱϣⲙⲡⲛⲟⲩⲧⲉ·
ⲁϥⲟⲩⲱϣⲃ·ⲛϭⲓⲡⲡⲉⲧⲟⲩⲁⲁⲃϫⲉⲙⲟⲟϣⲉϩⲛⲟⲩⲣⲁϣⲉⲁⲗⲗⲁⲣⲟⲉⲓⲥⲉⲣⲱⲧⲛⲛⲁϣⲏⲣⲉⲙⲡⲣⲣⲛⲟⲃⲉ·
ⲟⲩⲗⲁⲁⲩⲅⲁⲣⲡⲉⲡⲕⲟⲥⲙⲟⲥⲉⲧⲛⲛϩⲏⲧϥⲉⲃⲟⲗϫⲉⲟⲩⲡⲣⲟⲥⲟⲩⲟⲉⲓϣⲡⲉ·
ϯϩⲧⲏⲧⲛⲇⲉⲉⲣⲱⲧⲛⲛⲁϣⲏⲣⲉϩⲛⲛⲉⲓϯⲙⲉ
ⲙⲡⲣⲥⲩⲛⲧⲉⲭⲉⲓ·ⲙⲛⲟⲩⲥϩⲓⲙⲉⲉⲥϩⲟⲟⲩ
ⲙⲡⲣϫⲓⲙⲁⲥⲉⲛⲧⲛϩⲏⲕⲉ·
ⲉϣⲱⲡⲉⲟⲩⲛⲧⲏⲧⲛⲗⲁⲁⲩⲉⲣⲱⲙⲉϩⲛⲛⲉⲓⲙⲉⲣⲟⲥ·ⲙⲡⲣⲁⲛⲁⲅⲕⲁⲍⲉⲙⲙⲟϥ·ⲟⲩⲇⲉⲙⲡⲣϩϫϩⲱϫϥ·
ⲁⲗⲗⲁⲣⲟⲉⲓⲥⲉⲛⲉⲧⲙⲯⲩⲭⲏϫⲉⲕⲁⲥⲉⲣⲉⲡⲛⲟⲩⲧⲉⲛⲁⲣⲡⲉϥⲛⲁⲛⲙⲙⲉⲧⲛ·
ⲁⲩⲟⲩⲱϣⲃϫⲉϣⲗⲏⲗⲉϫⲱⲛⲡⲉⲛⲉⲓⲱⲧ·
ⲁⲩⲱⲁⲩⲉⲓⲉⲃⲟⲗϩⲓⲧⲟⲟⲧϥⲁⲩⲧⲁⲁⲩⲉⲧⲉϩⲓⲏ·ⲉⲩϯⲉⲟⲟⲩⲙⲡⲛⲟⲩⲧⲉⲉϫⲛⲛϣⲁϫⲉⲛⲥⲃⲱⲛⲧⲁϥϩⲱⲛⲙⲙⲟⲟⲩⲉⲧⲟⲟⲧⲟⲩ⁛—
ⲛⲧⲟϥϩⲱⲱϥⲟⲛⲡⲡⲉⲧⲟⲩⲁⲁⲃⲛⲁⲛⲁⲭⲱⲣⲏⲧⲏⲥ·ⲁⲡⲁⲡⲉⲥⲉⲛⲑⲓⲟⲥⲁϥⲁϩⲉⲣⲁⲧϥⲁϥⲙⲉⲗⲏⲧⲁϩⲛⲧⲁⲣⲭⲏⲙⲡϫⲱⲱⲙⲉⲛⲓⲉⲣⲉⲙⲓⲁⲥⲡⲉⲡⲣⲟⲫⲏⲧⲏⲥ⁛—
ⲁϥⲃⲱⲕⲇⲉⲛϭⲓⲡⲉϥⲥⲟⲛⲙⲛⲡⲣⲱⲙⲉⲙⲡⲓⲥⲧⲟⲥⲉⲧⲙⲟⲟϣⲉⲛⲙⲙⲁϥ·
ⲁⲩⲧⲉϣⲧⲉⲩⲁⲡⲟⲕⲣⲓⲥⲓⲥⲕⲁⲧⲁⲡϣⲁϫⲉⲙⲡⲡⲉⲧⲟⲩⲁⲁⲃ·ⲡⲁⲓⲛⲧⲁϥⲥⲡⲥⲡⲡϫⲟⲉⲓⲥⲉϫⲱⲟⲩ·
ⲁϥⲥⲟⲟⲩⲧⲛⲛⲧⲉⲩϩⲓⲏ·ⲁⲩⲕⲧⲟⲟⲩϣⲁⲣⲟⲟϥⲉⲧϥⲣⲓϩⲛⲟⲩϭⲉⲡⲏϫⲓⲛⲛϣⲟⲣⲡ⁛—
ⲛⲧⲉⲣⲟⲩⲉⲓⲇⲉϣⲁⲣⲟϥⲁⲩⲥⲱⲧⲙⲉⲣⲟϥⲉϥⲙⲉⲗⲏⲧⲁ·ϩⲛⲛϣⲁϫⲉⲙⲡⲡⲉⲧⲟⲩⲁⲁⲃⲓⲉⲣⲉⲙⲓⲁⲥϩⲛⲟⲩⲛⲟϭⲛⲥϭⲣⲁϩⲧⲙⲛⲟⲩⲧⲱⲱⲃⲥ·
ⲁⲩϩⲙⲟⲟⲥⲙⲡⲃⲟⲗⲙⲡⲉϥⲙⲁⲛϣⲱⲡⲉⲛⲟⲩⲕⲟⲩⲓⲉⲩϫⲱⲙⲙⲟⲥϫⲉⲡⲇⲓⲕⲁⲓⲟⲛⲁⲛⲡⲉⲁⲩⲱⲡϩⲱⲃⲡⲣⲉⲡⲉⲓ·ⲁⲛⲡⲉ·ⲉⲧⲣⲉⲛⲙⲟⲩⲧⲉⲉϩⲟⲩⲛⲉⲡⲡⲉⲧⲟⲩⲁⲁⲃϣⲁⲛⲧⲉϥⲟⲩⲱⲉϥⲙⲉⲗⲏⲧⲁ·ⲁⲩⲱⲉϥϣⲗⲏⲗ·
ⲛⲧⲉⲣⲉϥⲟⲩⲱⲇⲉⲙⲡⲉⲡⲣⲟⲫⲏⲧⲏⲥ·ⲛϥϫⲱⲕϥⲉⲃⲟⲗ·ⲁⲩⲧⲱⲟⲩⲛϫⲉⲉⲩⲛⲁⲕⲱⲗϩⲉⲡⲣⲟ·ⲁϥⲁⲣⲭⲉⲓⲥⲑⲉⲉⲡⲉⲡⲣⲟⲫⲏⲧⲏⲥⲓⲉⲍⲉⲕⲓⲏⲗ·
ⲁⲩϩⲙⲟⲟⲥⲉϩⲣⲁⲓⲟⲛⲙⲡⲟⲩⲙⲟⲩⲧⲉⲉϩⲟⲩⲛ⁛—
ⲗⲟⲓⲡⲟⲛⲁϥϫⲉⲕⲡⲉⲡⲣⲟⲫⲏⲧⲏⲥⲉⲃⲟⲗⲧⲏⲣϥⲁϥⲕⲁⲣⲱϥ·ⲉⲛⲉⲁⲣⲟⲩϩⲉⲅⲁⲣϣⲱⲡⲉ·
ⲉⲁⲩⲕⲱⲗϩⲉⲡⲣⲟ·ⲁϥⲣⲟⲩⲱⲛⲁⲩϫⲉⲥⲙⲟⲩⲉⲣⲟⲓ
ⲁϥϭⲱϣⲧⲉⲃⲟⲗⲉϫⲱⲟⲩϩⲛⲟⲩⲛⲟϭⲛϣⲟⲩϣⲧⲁϥϣⲁϫⲉⲛⲙⲙⲁⲩ·ⲉϥϫⲱⲙⲙⲟⲥ·ϫⲉⲉⲧⲉⲧⲛⲉⲓⲉⲡⲉⲓⲙⲁⲉⲓⲥⲁⲟⲩⲏⲣⲛⲛⲁⲩ·
ⲡⲉϫⲁⲩϫⲉⲁⲛⲉⲓϫⲓⲛⲛϣⲱⲣⲡⲙⲡⲉⲛⲧⲟⲗⲙⲁⲉⲙⲟⲩⲧⲉⲉϩⲟⲩⲛⲉⲣⲟⲕϣⲁⲛⲧⲕⲟⲩⲱⲉⲕⲙⲉⲗⲏⲧⲁ⁛
ⲛⲧⲉⲩⲛⲟⲩⲁϥⲣⲓⲙⲉⲁϥϩⲓⲟⲩⲉⲉϩⲟⲩⲛϩⲙⲡⲉϥϩⲏⲧ·ⲡⲉϫⲁϥⲛⲁⲩϫⲉⲁⲓϯⲛⲟⲩⲛⲟϭⲛⲟⲥⲉⲙⲡϩⲟⲟⲩ·ⲁⲩⲱⲛϩⲓⲥⲉⲧⲏⲣⲟⲩⲛⲧⲁⲓⲁⲁⲩϩⲛⲡⲉⲧϣⲟⲩⲉⲓⲧ⁛—
ⲛⲧⲁϥϫⲉⲛⲁⲓⲇⲉⲛϭⲓⲡⲉⲧⲟⲩⲁⲁⲃⲉϥⲡⲏⲧⲉⲃⲟⲗⲙⲡⲉⲟⲟⲩⲉⲧϣⲟⲩⲉⲓⲧⲛⲛⲣⲱⲙⲉ·
ⲛⲧⲁϥⲙⲕⲁϩⲇⲉⲉⲡⲉϥϩⲏⲧϫⲉⲁⲩⲉⲓⲙⲉϩⲟⲗⲱⲥ·ϫⲉⲁϥⲙⲉⲗⲏⲧⲁ·
ⲁⲧⲉⲧⲛⲉⲓⲙⲉϭⲉ·ⲱⲛⲁⲙⲉⲣⲁⲧⲉϫⲉⲉⲣⲉⲛⲉⲧⲟⲩⲁⲁⲃⲉⲡⲓⲑⲩⲙⲉⲓⲉⲡⲉⲟⲟⲩⲙⲡⲛⲟⲩⲧⲉⲙⲁⲩⲁⲁϥ·
ⲉϣϫⲉⲙⲙⲟⲛⲥⲱⲧⲙⲉⲡⲙⲉⲗⲓⲟⲅⲣⲁⲫⲟⲥⲉⲧⲟⲩⲁⲁⲃⲇⲁⲇⲉϥϫⲱⲙⲙⲟⲥϫⲉⲁⲓⲉⲡⲓⲑⲩⲙⲉⲓⲉⲛⲉⲕⲉⲛⲧⲟⲗⲏ
ϭⲱϣⲧⲉϩⲣⲁⲓⲉϫⲱⲓⲛⲅⲛⲁⲛⲁⲓ·
ⲡⲥⲟⲫⲟⲥϩⲱⲱϥⲉⲡⲉϩⲟⲟⲩⲡⲁⲩⲗⲟⲥϫⲓϣⲕⲁⲕⲉⲃⲟⲗⲉϥϫⲱⲙⲙⲟⲥϫⲉⲕⲁⲓⲅⲁⲣⲧⲛⲁϣⲁϩⲟⲙϩⲙⲡⲁⲓⲉⲛⲟⲩⲉϣϯϩⲓⲱⲱⲛⲙⲡⲉⲛⲙⲁⲛϣⲱⲡⲉⲉⲃⲟⲗϩⲛⲧⲡⲉ·
ⲁⲩⲱϫⲉⲟⲩⲛⲧⲁⲛⲙⲙⲁⲩⲛⲟⲩⲕⲱⲧⲉⲃⲟⲗϩⲓⲧⲙⲡⲛⲟⲩⲧⲉ·ⲟⲩⲏⲓⲛⲁⲧⲙⲟⲩⲛⲅⲛϭⲓϫⲛϣⲁⲉⲛⲉϩϩⲛⲙⲡⲏⲩⲉ⁛—
ⲥⲱⲧⲙⲇⲉⲟⲛⲉⲧⲉⲓⲛⲟϭⲛϣⲡⲏⲣⲉⲛⲧⲁⲥϣⲱⲡⲉⲉⲃⲟⲗϩⲓⲧⲟⲟⲧϥⲉⲧⲓⲉϥⲟⲙⲙⲟⲛⲁⲭⲟⲥ·ⲉϥⲉⲥⲩⲭⲁⲍⲉ·ϩⲛⲧⲉϥⲣⲓⲙⲡⲁⲧϥⲣⲉⲡⲓⲥⲕⲟⲡⲟⲥ
ⲁϥϣⲱⲛⲉⲉⲡⲉϥⲥⲡⲗⲏⲛ·ⲛⲟⲩⲥⲟⲡϩⲙⲡϣⲟⲙⲛⲧⲙⲡϣⲁⲙⲡⲃⲱⲗⲉⲃⲟⲗ
ⲙⲡⲉϥⲧⲁⲙⲉⲗⲁⲁⲩⲇⲉϩⲛⲛⲉⲥⲛⲏⲩϫⲉⲉϥϣⲱⲛⲉ·ⲛⲉⲁϥϫⲟⲟⲥⲅⲁⲣⲛⲁⲩⲡⲉϫⲉϣⲗⲏⲗⲉϫⲱⲓ
ⲛⲧⲁⲃⲱⲕⲉⲧϩⲉⲛⲉⲉⲧⲉⲛⲁⲡⲁⲁⲃⲣⲁϩⲁⲙ·ⲛⲧⲁϭⲙⲡϣⲓⲛⲉ·ⲙⲡⲉⲓⲥⲟⲛⲉⲧϩⲙⲡⲙⲁⲉⲧⲙⲙⲁⲩ
ⲉⲣϣⲁⲛⲡϫⲟⲉⲓⲥϯⲧϩⲉⲛⲁⲓⲛⲧⲁⲕⲧⲟⲓϣⲁⲣⲱⲧⲛ·
ⲛⲧⲁϥϫⲉⲡⲁⲓⲇⲉⲉϥⲟⲩⲱϣⲉⲧⲙⲧⲣⲉⲗⲁⲁⲩⲉⲓⲙⲉϫⲉⲉϥϣⲱⲛⲉϩⲟⲗⲱⲥ·
ⲉⲣϣⲁⲛⲟⲩⲁⲇⲉϣⲓⲛⲉϩⲛⲟⲩⲁⲕⲣⲓⲃⲓⲁ·ϫⲉⲉⲧⲃⲉⲟⲩⲁⲡⲉⲓⲡⲉⲧⲟⲩⲁⲁⲃϫⲉⲡⲁⲓ·
ⲙⲁⲣϥⲱϣϩⲙⲡϫⲱⲱⲙⲉⲛⲓⲱⲃⲡⲙⲁⲕⲁⲣⲓⲟⲥ·ϥⲛⲁϩⲉⲉⲡϫⲟⲉⲓⲥⲉϥϫⲱⲙⲙⲟⲥⲛⲁϥϫⲉⲉⲕⲙⲉⲉⲩⲉϫⲉⲛⲧⲁⲓⲣⲛⲁⲓⲛⲁⲕⲉⲕⲉⲥⲙⲟⲧ·ⲁⲗⲗⲁϫⲉⲉⲕⲉⲟⲩⲱⲛϩⲉⲃⲟⲗⲛⲇⲓⲕⲁⲓⲟⲥ⁛—
ⲡⲁⲩⲗⲟⲥϩⲱⲱϥϫⲱⲙⲙⲟⲥϫⲉⲉⲓⲉⲓⲣⲉⲛⲛⲁⲓⲧⲏⲣⲟⲩⲉⲧⲃⲉⲡⲉⲩⲁⲅⲅⲉⲗⲓⲟⲛϫⲉⲉⲓⲉϣⲱⲡⲉⲛⲁϥⲛⲕⲓⲛⲱⲛⲟⲥ⁛—
ⲛⲧⲉⲣⲉⲡⲡⲉⲧⲟⲩⲁⲁⲃⲇⲉⲁⲡⲁⲡⲉⲥⲩⲛⲑⲓⲟⲥ·ⲣⲟⲩϩⲃⲇⲟⲙⲁⲥⲉϥϣⲱⲛⲉ·ⲙⲡⲉⲛⲉⲥⲛⲏⲩϣⲓⲛⲉⲛⲥⲱϥ·ⲉϥⲙⲉⲉⲩⲉϫⲉⲉϥϩⲙⲡⲃⲏⲃ·
ⲁⲩϣⲁϫⲉⲙⲛⲛⲉⲩⲉⲣⲏⲩϫⲉⲁⲡⲉⲥⲩⲛⲑⲓⲟⲥϣⲏⲙⲱⲥⲕ·ⲙⲁⲣⲛϣⲓⲛⲉⲛⲥⲱϥ·
ϫⲉⲙⲉϣⲁⲕⲛⲧⲁϥϣⲱⲛⲉ·ϩⲓⲧⲉϩⲓⲏ·ⲏⲙⲉϣⲁⲕⲛⲧⲁⲡϩⲓⲥⲉⲑⲙⲕⲟϥ·ⲙⲡⲉϥⲉϣⲧⲱⲟⲩⲛ·
ⲁⲩϫⲟⲟⲩⲇⲉⲛⲟⲩⲥⲟⲛⲉⲡⲉϥⲟⲩⲏⲏⲃⲉϥϣⲓⲛⲉⲛⲥⲱϥ·
ⲛⲧⲉⲣⲉϥⲃⲱⲕⲇⲉⲕⲁⲧⲁⲟⲩⲟⲓⲕⲟⲛⲟⲙⲓⲁ·ⲛⲧⲉⲡⲛⲟⲩⲧⲉ·ⲁⲛⲁⲩⲉⲛⲉϣⲡⲏⲣⲉⲛⲧⲉⲡⲛⲟⲩⲧⲉ·
ⲛⲉϩⲟⲟⲩⲇⲉⲧⲏⲣⲟⲩⲛⲧⲁϥⲁⲁϥⲉϥⲛⲕⲟⲧⲕⲉϥϣⲱⲛⲉⲛⲉⲣⲉⲛⲉⲧⲟⲩⲁⲁⲃⲇⲓⲁⲕⲱⲛⲉⲓⲉⲣⲟϥϣⲁⲡⲉϩⲟⲟⲩⲛⲧⲁⲡⲥⲟⲛⲃⲱⲕϣⲁⲣⲟϥ·
ⲛⲧⲉⲣⲉⲡⲥⲟⲛⲇⲉⲃⲱⲕϣⲁⲣⲟϥⲉϥϩⲉⲉⲡⲣⲟⲛⲧⲕⲟⲩⲓⲛⲣⲓⲉⲧϥⲛϩⲏⲧⲥⲉϥⲟⲩⲏⲛ⁛—
ϩⲓⲧⲛⲟⲩⲉⲩⲕⲁⲓⲣⲓⲁⲇⲉⲛⲧⲉⲡⲛⲟⲩⲧⲉ·ⲛⲧⲉⲣϥⲥⲉⲕⲡⲙⲟⲩⲥⲇⲉⲙⲡⲣⲟⲁϥⲙⲟⲩⲧⲉⲉϩⲟⲩⲛⲕⲁⲧⲁⲡⲕⲁⲛⲱⲛⲛⲛⲉⲥⲛⲏⲩϫⲉⲥⲙⲟⲩⲉⲣⲟⲓ·
ⲙⲡⲉϩⲟⲟⲩⲅⲁⲣⲉⲧⲙⲙⲁⲩ·ⲛⲉⲁⲥϫⲱⲛϥ·ⲉⲣⲉⲡⲡⲉⲧⲟⲩⲁⲁⲃⲁⲡⲁϩⲏⲗⲓⲁⲥⲡⲉⲑⲉⲥⲃⲩⲧⲏⲥⲡⲁⲡⲧⲟⲟⲩⲙⲡⲕⲁⲣⲙⲏⲗⲟⲥϩⲁϩⲧⲏϥ·ⲉϥϭⲓⲛⲉⲙⲡⲉϥϣⲓⲛⲉⲛⲧⲁⲩⲧⲛⲛⲟⲟⲩϥⲅⲁⲣⲉⲃⲟⲗϩⲓⲧⲙⲡⲛⲟⲩⲧⲉ·ⲉⲥⲗⲥⲱⲗϥϩⲛⲛⲉϥϣⲁϫⲉ·
ⲛⲧⲉⲣⲉⲡⲥⲟⲛⲇⲉⲣⲟⲩⲛⲟϭⲛⲕⲱⲟⲩⲉϥⲁϩⲉⲣⲁⲧϥⲉϥⲙⲟⲩⲧⲉⲉϩⲟⲩⲛϫⲉⲥⲙⲟⲩⲉⲣⲟⲓ·
ⲁⲡⲉⲡⲣⲟⲫⲏⲧⲏⲥⲧⲱⲟⲩⲛϫⲉⲉϥⲛⲁⲁⲛⲁⲭⲱⲣⲉⲓⲛⲁϥ·ⲁⲁⲡⲁⲡⲉⲥⲉⲛⲑⲓⲟⲥⲁⲙⲁϩⲧⲉⲙⲙⲟϥ·ⲉϥϫⲱⲙⲙⲟⲥ
ϫⲉⲛϯⲛⲁⲕⲁⲁⲕⲉⲃⲟⲗⲁⲛϣⲁⲛⲧⲓⲥⲟⲗⲥⲗⲛⲕⲉⲕⲟⲩⲓ·
ⲡⲥⲟⲛⲇⲉϩⲱⲱϥⲛⲧⲉⲣϥⲧⲙⲣⲟⲩⲱⲛⲁϥⲁϥϯⲡⲉϥⲟⲩⲟⲓⲉϩⲟⲩⲛⲛⲥⲟⲟⲩⲧⲛⲁϫⲛⲙⲏⲛⲉⲩⲉⲙⲙⲟϥϩⲟⲗⲱⲥ·
ⲁϥϩⲉⲇⲉⲉⲡⲡⲉⲧⲟⲩⲁⲁⲃⲥⲛⲁⲩⲉⲩϩⲙⲟⲟⲥ
ⲁⲡⲁⲡⲉⲥⲩⲛⲑⲓⲟⲥⲙⲉⲛⲛϥⲛⲕⲟⲧⲕ*ⲡⲡⲉⲧⲟⲩⲁⲁⲃϩⲱⲱϥϩⲏⲗⲓⲁⲥⲛϥϩⲙⲟⲟⲥϩⲁϩⲧⲏϥⲉϥϭⲓⲛⲉⲙⲡⲉϥϣⲓⲛⲉ·
ⲛⲧⲉⲣⲉⲡⲥⲟⲛⲇⲉⲃⲱⲕⲉϩⲟⲩⲛⲁϥϫⲓⲥⲙⲟⲩⲛⲧⲟⲟⲧⲟⲩⲙⲡⲉⲥⲛⲁⲩ
ⲁϥⲁϩⲉⲣⲁⲧϥⲙⲡⲉϥⲉϣϭⲱϣⲧⲇⲉⲉϩⲟⲩⲛϩⲙⲡϩⲟⲙⲡⲉⲡⲣⲟⲫⲏⲧⲏⲥ·ϩⲏⲗⲓⲁⲥ·ⲉⲧⲃⲉⲛⲁⲕⲧⲓⲛⲛⲟⲩⲟⲉⲓⲛⲉⲧⲃⲟⲩⲃⲟⲩϩⲙⲡⲉϥϩⲟⲛⲧϩⲉⲛⲟⲩⲉⲃⲣⲏⲏϭⲉ·
ⲕⲁⲧⲁⲡⲉⲧⲥⲏϩϫⲉⲧⲟⲧⲉⲛⲇⲓⲕⲁⲓⲟⲥⲥⲉⲛⲁⲣⲟⲩⲟⲉⲓⲛⲛⲧϩⲉⲙⲡⲣⲏ·ϩⲛⲧⲙⲛⲧⲣⲣⲟⲙⲡⲉⲩⲉⲓⲱⲧ·
ⲡⲡⲉⲧⲟⲩⲁⲁⲃⲇⲉⲁⲡⲁⲡⲉⲥⲩⲛⲑⲓⲟⲥ·ⲁϥⲁⲕⲁⲛⲁⲅⲧⲉⲓⲉϩⲟⲩⲛⲉⲡⲥⲟⲛ·
ⲡⲉϫⲁϥⲛⲁϥϫⲉⲙⲏⲧⲉⲛⲧⲟⲗⲏⲛⲛⲉⲥⲛⲏⲩⲧⲉⲧⲁⲓⲉⲧⲣⲉⲕϯⲡⲉⲕⲟⲩⲟⲓⲉϩⲟⲩⲛⲁϫⲛⲙⲟⲩⲙϣ·
ⲁⲣⲁⲛⲉⲟⲩⲁⲣⲭⲱⲛⲡⲉⲡⲁⲓⲕⲛⲁⲉϣⲃⲱⲕⲉϩⲟⲩⲛⲉϫⲱϥⲁϫⲛⲧⲣⲉⲩⲙⲏⲛⲉⲩⲉⲙⲙⲟⲕⲛⲁϥ·
ⲁϥⲟⲩⲱϣⲃⲛϭⲓⲡⲥⲟⲛϫⲉⲕⲱⲛⲁⲓⲉⲃⲟⲗⲡⲁⲉⲓⲱⲧⲁⲓⲣⲛⲟⲃⲉ·ⲛⲧⲁⲓⲱⲥⲕϩⲓⲣⲙⲡⲣⲟⲉⲓⲥⲟⲩⲛⲟϭⲛⲕⲱⲟⲩϯⲧⲱϩⲙ·
ⲁⲓⲙⲉⲉⲩⲉϫⲉϩⲁⲣⲏⲩⲉⲕϣⲱⲛⲉ·ⲙⲡⲉⲕⲉϣⲧⲱⲟⲩⲛ·ⲉⲧⲃⲉⲡⲁⲓⲁⲓϯⲡⲁⲟⲩⲟⲓⲉϩⲟⲩⲛⲉϭⲙⲡⲉⲕϣⲓⲛⲉ·
ⲁⲡⲉⲡⲣⲟⲫⲏⲧⲏⲥⲟⲩⲱϣⲃϫⲉⲡⲧⲱϣⲙⲡⲛⲟⲩⲧⲉⲡⲉⲡⲁⲓ·
ⲡⲁⲛⲧⲱⲥⲉϥⲙⲡϣⲁⲙⲡⲉⲛⲁⲥⲡⲁⲥⲙⲟⲥ·ⲉⲧⲃⲉⲛⲉϥⲡⲣⲁⲝⲓⲥ·ⲉⲧⲛⲁⲛⲟⲩⲙⲡⲉⲡⲛⲟⲩⲧⲉϩⲟⲩⲣⲱϥ·ⲙⲙⲟϥ⁛—
ⲛⲧⲉⲣⲉϥϫⲉⲛⲁⲓⲇⲉⲛϭⲓⲡⲉⲡⲣⲟⲫⲏⲧⲏⲥⲁϥⲁⲛⲁⲭⲱⲣⲉⲓ
ⲛⲧⲉⲣⲉϥⲁⲛⲁⲭⲱⲣⲉⲓⲇⲉⲁⲡⲥⲟⲛϣⲁϫⲉⲙⲛⲁⲡⲁⲡⲉⲥⲩⲛⲑⲓⲟⲥ·ϫⲉⲟⲩⲉⲃⲟⲗⲧⲱⲛⲡⲉⲡⲉⲓⲥⲟⲛ·ⲛⲣⲁⲧϥⲱⲉⲣⲉⲧⲉⲓⲛⲟϭⲛⲭⲁⲣⲓⲥ·
ⲕⲱⲧⲉⲉⲣⲟϥⲛⲧⲉⲓϩⲉ·ⲛⲁⲙⲉⲙⲡⲓⲛⲁⲩⲉⲟⲩⲟⲛⲛⲧⲉⲓϩⲉⲉⲛⲉϩⲉϥⲟⲛⲣⲙⲣⲁϣⲉϥⲙⲉϩⲛⲟⲩⲟⲉⲓⲛⲛⲓⲙ·
ⲁⲩⲱϯϫⲱⲙⲙⲟⲥⲛⲁⲕⲡⲁⲥⲟⲛϫⲉⲛⲧⲉⲩⲛⲟⲩⲛⲧⲁⲓⲁⲙⲁϩⲧⲉⲛⲛⲉϥϭⲓϫⲁⲓϯⲡⲓⲉⲣⲟⲟⲩⲁⲩⲛⲟϭⲛϭⲟⲙϣⲱⲡⲉϩⲙⲡⲁⲥⲱⲙⲁ
ⲁⲓⲗⲟⲉⲓⲟⲛⲁⲧϭⲟⲙⲁⲓϭⲙϭⲟⲙⲛⲁⲙⲉⲁⲓⲉⲩⲫⲣⲁⲛⲉⲛⲧϩⲉⲛⲟⲩⲁⲉⲁϥϭⲱⲗϩⲛⲟⲩⲙⲁⲛⲥⲱ·
ⲉⲓϣⲁⲛϫⲟⲟⲥϫⲉⲡⲁⲡⲉⲓⲧⲟⲟⲩⲡⲉ·ⲙⲡⲓⲛⲁⲩⲉⲟⲩⲟⲛⲉⲛⲉϩϩⲛⲧⲉⲛⲉⲡⲁⲣⲭⲓⲁⲉϥⲉⲓⲛⲉⲙⲙⲟϥ·ⲁⲩⲱⲙⲡⲓⲛⲁⲩⲉⲟⲩⲟⲛⲉⲛⲉϩⲉϥⲣⲏⲧⲛϥⲱⲛⲧϩⲉⲙⲡⲁⲓ·
ⲡⲉϫⲁϥⲙⲡⲥⲟⲛϫⲉϩⲟⲙⲟⲓⲱⲥⲉⲓⲛⲁϫⲉⲕⲛⲁϩⲁⲣⲉϩⲉⲡⲉⲓϣⲁϫⲉϩⲛⲟⲩⲙⲩⲥⲧⲏⲣⲓⲟⲛⲁⲩⲱⲛⲅⲛⲁϭⲗⲡϣⲁϫⲉⲉⲃⲟⲗⲁⲛ·
ⲁϥⲟⲩⲱϣⲃⲛϭⲓⲡⲥⲟⲛϫⲉⲙⲏⲁⲣⲁⲙⲛⲛⲥⲁⲟⲩⲟⲉⲓϣⲛⲧⲉⲧⲁⲛⲁⲅⲕⲏⲧⲁϩⲟⲓⲛϯⲛⲁϭⲟⲗⲡϥⲉⲃⲟⲗⲁⲛ·
ⲉⲧⲃⲉⲟⲩⲁⲕϫⲟⲟⲥⲛⲧⲉⲓϩⲉ·
ⲉⲕⲥⲱⲧⲙⲁⲛⲉϩⲣⲁⲫⲁⲏⲗ·ⲡⲁⲅⲅⲉⲗⲟⲥⲉϥϣⲁϫⲉⲙⲛⲡⲡⲉⲧⲟⲩⲁⲁⲃⲇⲱⲃⲓⲧ·ⲉϥϫⲱⲙⲙⲟⲥ
ϫⲉⲡⲙⲩⲥⲧⲏⲣⲓⲟⲛⲙⲡⲣⲣⲟⲛⲁⲛⲟⲩϩⲟⲡϥ·ⲛⲉϩⲃⲏⲩⲉⲇⲉⲙⲡⲛⲟⲩⲧⲉⲛⲁⲛⲟⲩⲟⲛϩⲟⲩⲉⲃⲟⲗ·
ⲁⲗⲗⲁϯⲥⲟⲟⲩⲛϫⲉⲉⲕⲙⲟⲥⲧⲉⲙⲡⲉⲟⲟⲩⲉⲧϣⲟⲩⲉⲓⲧⲛⲛⲣⲱⲙⲉ·
ⲧⲁⲩⲉⲡϫⲱⲕⲉⲣⲟⲓϩⲛⲟⲩⲙⲉϫⲉⲛⲓⲙⲡⲉⲡⲉⲓⲣⲱⲙⲉ·ⲁⲩⲱϯⲛⲁⲗⲩⲡⲏⲙⲙⲟⲕⲁⲛ·
ⲁϥⲟⲩⲱϣⲃⲛϭⲓⲡⲙⲉϩⲙⲛⲧϣⲟⲙⲧⲉⲛⲁⲡⲟⲥⲧⲟⲗⲟⲥ·ⲁⲡⲁⲡⲉⲥⲩⲛⲑⲓⲟⲥⲡⲉϫⲁϥⲙⲡⲥⲟⲛϫⲉⲛⲧⲉⲣⲓⲃⲱⲕⲟⲩⲛϩⲓⲧⲟⲟⲧⲧⲏⲩⲧⲛϫⲉⲉⲓⲛⲁⲃⲱⲕϣⲁⲡⲥⲟⲛⲉⲧϩⲛⲧϩⲉⲛⲉⲉⲧⲉⲛⲁⲡⲁⲁⲃⲣⲁϩⲁⲙⲛⲧⲁϭⲙⲡⲉϥϣⲓⲛⲉ·
ⲁⲓⲛⲁⲩⲉⲡⲁⲥⲱⲙⲁⲉϥⲟⲛⲁⲧϭⲟⲙ
ⲁⲓϫⲟⲟⲥϫⲉⲙⲏⲡⲟⲧⲉⲛⲧⲉⲟⲩⲗⲟϫⲗϫⲧⲁϩⲟⲓ·ϩⲛⲧⲉϩⲓⲏ·
ⲡⲁⲥⲡⲗⲏⲛⲟⲩⲛⲁϥⲛⲟϫⲧ·ⲉⲡϣⲱⲛⲉϫⲓⲛⲙⲡⲛⲁⲩⲛⲧⲁⲓⲁⲛⲁⲭⲱⲣⲉⲓⲛⲁⲓϩⲓⲧⲟⲟⲧⲧⲏⲩⲧⲛⲁⲩⲱⲙⲡⲓⲛⲁⲩⲉⲣⲱⲙⲉϣⲁⲛⲧⲉⲕⲉⲓϣⲁⲣⲟⲓ·
ⲛⲧⲉⲣⲉⲡⲁⲥⲡⲗⲏⲛⲇⲉϭⲱⲉϥⲃⲁⲥⲁⲛⲓⲍⲉⲙⲙⲟⲓⲉⲙⲁⲧⲉⲁⲓⲡⲁⲣⲁⲕⲁⲗⲉⲓⲙⲡϫⲟⲉⲓⲥⲛⲥⲁϥⲉⲧⲣⲉϥⲭⲁⲣⲓⲍⲉⲛⲁⲓⲙⲡⲧⲁⲗϭⲟ·
ⲛⲧⲉⲣⲉϥⲛⲁⲩⲇⲉⲉⲧⲁⲙⲛⲧⲁⲥⲑⲉⲛⲏⲥⲙⲛⲧⲁⲙⲛⲧⲁⲧⲣⲱⲙⲉ·ⲁϥⲧⲛⲛⲟⲟⲩⲟⲩⲁⲛⲛⲉⲧⲟⲩⲁⲁⲃϣⲁⲣⲟⲓ·ⲁϥⲭⲁⲣⲓⲍⲉⲙⲡⲧⲁⲗϭⲟⲙⲡⲁⲥⲱⲙⲁ·
ⲁⲩⲱϯϫⲱⲙⲙⲟⲥⲛⲁⲕϫⲉⲉⲡⲉⲓⲇⲏⲡⲉⲓⲣⲱⲙⲉⲡⲁⲓⲛⲧⲁⲕϫⲓⲥⲙⲟⲩⲉⲃⲟⲗϩⲓⲧⲟⲟⲧϥ·ⲡⲁⲓⲡⲉϩⲏⲗⲓⲁⲥ·ⲡⲉⲑⲉⲥⲃⲩⲧⲏⲥⲡⲁⲡⲧⲟⲟⲩⲙⲡⲕⲁⲣⲙⲏⲗⲟⲥ
ⲡⲉⲛⲧⲁⲩⲁⲛⲁⲗⲁⲙⲃⲁⲛⲉⲙⲙⲟϥϩⲛⲟⲩϩⲁⲣⲙⲁⲛⲕⲱϩⲧⲙⲛⲟⲩⲕⲙⲧⲱⲉϩⲣⲁⲓⲉⲧⲡⲉ·
ϯⲥⲟⲡⲥⲡⲙⲙⲟⲕⲡⲁⲥⲟⲛⲙⲙⲁⲓⲛⲟⲩⲧⲉⲙⲡⲣⲟⲩⲉⲛϩⲡⲙⲩⲥⲧⲏⲣⲓⲟⲛⲉⲃⲟⲗⲉⲗⲁⲁⲩⲛⲣⲱⲙⲉϣⲁⲡⲉϩⲟⲟⲩⲙⲡⲁϭⲙⲡϣⲓⲛⲉϫⲉⲛⲛⲉⲕⲗⲩⲡⲏⲙⲙⲟⲓ⁛—
ⲛⲁⲓⲇⲉⲛⲧⲉⲣⲉϥⲥⲟⲧⲙⲟⲩⲛϭⲓⲡⲥⲟⲛ·ⲁⲩⲛⲟϭⲛⲣⲁϣⲉϣⲱⲡⲉⲛⲁϥ·ⲙⲛⲟⲩⲥⲟⲗⲥⲗ·ⲁⲩⲱⲙⲡϥⲟⲩⲉⲛϩⲡⲙⲩⲥⲧⲏⲣⲓⲟⲛⲉⲃⲟⲗⲉⲗⲁⲁⲩⲛⲣⲱⲙⲉϣⲁⲡⲉϩⲟⲟⲩⲛⲧⲁⲡⲉⲕⲗⲏⲣⲟⲥⲙⲙⲁⲓⲛⲟⲩⲧⲉ·ⲛⲧⲉⲧⲡⲟⲗⲓⲥⲙⲙⲁⲓⲡⲉⲭⲣⲓⲥⲧⲟⲥⲕⲃⲧⲁⲙⲁϩⲧⲉⲙⲡⲉⲧⲙⲡϣⲁⲛⲁⲙⲉⲛⲧⲙⲛⲧⲉⲡⲓⲥⲕⲟⲡⲟⲥϫⲉⲉⲩⲛⲁϫⲓⲧϥⲙⲡⲡⲁⲧⲣⲓⲁⲣⲭⲏⲥⲉⲧⲟⲩⲁⲁⲃⲁⲡⲁⲇⲁⲙⲓⲁⲛⲟⲥⲡⲁⲣⲭⲓⲉⲡⲓⲥⲕⲟⲡⲟⲥⲉⲧⲣϥⲭⲉⲓⲣⲟⲇⲟⲛⲉⲓⲙⲙⲟϥⲛⲉⲡⲓⲥⲕⲟⲡⲟⲥ·
ⲁⲧⲉⲧⲛⲉⲓⲙⲉϭⲉⲱⲛⲁⲙⲉⲣⲁⲧⲉϫⲉⲡⲉⲧⲛⲁϩⲁⲣⲉϩⲉⲛⲉⲛⲧⲟⲗⲏⲛⲧⲙⲛⲧⲙⲟⲛⲁⲭⲟⲥⲛϥϫⲱⲕⲟⲩⲉⲃⲟⲗⲁϫⲛⲙⲛⲧⲣⲉϥϫⲛⲁⲁⲩϣⲁⲣⲉⲡⲉⲭⲣⲓⲥⲧⲟⲥⲙⲉⲣⲓⲧϥ·
ⲛϥϫⲟⲟⲩϣⲁⲣⲟϥⲛⲛⲉϥⲡⲉⲧⲟⲩⲁⲁⲃⲙⲙⲁⲧⲉⲁⲗⲗⲁϣⲁⲩⲛⲁⲩⲉⲡⲛⲟⲩⲧⲉⲕⲁⲧⲁⲧϭⲓⲛⲛⲁⲩⲙⲡⲟⲩⲁⲡⲟⲩⲁⲕⲁⲧⲁⲡⲉⲥⲙⲟⲧⲉⲧⲉϥⲟⲩⲱϣⲉⲧϥⲱⲛϩⲉⲃⲟⲗⲉⲣⲟⲟⲩⲛϩⲏⲏⲧϥ·
ⲉϣϫⲉⲙⲙⲟⲛⲥⲱⲧⲙⲉⲛⲉⲅⲣⲁⲫⲏⲛⲛⲓϥⲉⲛⲧⲉⲡⲛⲟⲩⲧⲉ·ⲥⲉⲛⲁⲧⲟⲩⲛⲟⲉⲓⲁⲧⲕⲉⲃⲟⲗⲕⲁⲧⲁⲡⲉⲧⲉϣϣⲉ·ⲁⲩⲱⲕⲁⲧⲁⲛⲉϩⲣⲏⲧⲱⲛⲛⲧⲁⲛϫⲟⲟⲩ·
ⲉⲧⲃⲉⲡⲉⲛϫⲟⲉⲓⲥⲛⲉⲓⲱⲧⲛⲉⲡⲓⲥⲕⲟⲡⲟⲥⲁⲡⲁⲡⲉⲥⲩⲛⲑⲓⲟⲥ·ⲡⲉⲛⲧⲁⲡⲛⲟⲩⲧⲉⲟⲩⲟⲛϩⲉⲃⲟⲗϩⲛⲛⲉⲛⲕⲁⲓⲣⲟⲥⲉϥⲟⲛⲛⲁϣⲧⲉⲉⲡⲉⲛⲧⲟϣⲙⲙⲁⲧⲉⲁⲛ·ⲁⲗⲗⲁⲉⲧⲉⲭⲱⲣⲁⲧⲏⲣⲥ·ⲛⲛⲉⲭⲣⲓⲥϯⲁⲛⲟⲥⲛⲟⲣⲑⲟⲇⲟⲝⲟⲥ·
ⲁⲙⲟⲩⲉϩⲟⲩⲛⲉⲡϣⲟⲣⲡⲛϫⲱⲱⲙⲉⲛⲧⲅⲉⲛⲏⲥⲓⲥ·ⲛⲧⲛⲛⲁⲩϫⲉⲉⲥϣⲁϫⲉⲉⲧⲃⲉⲧϭⲓⲛⲛⲁⲩⲉⲡⲛⲟⲩⲧⲉⲛⲁϣⲛϩⲉ·
ⲓⲁⲕⲱⲃⲙⲉⲛⲡⲡⲁⲧⲣⲓⲁⲣⲭⲏⲥⲛⲧⲉⲣⲉϩⲣⲉⲃⲉⲕⲕⲁⲥⲱⲧⲙⲉⲛϣⲁϫⲉⲛⲏⲥⲁⲩ·ⲡⲉⲥⲛⲟϭⲛϣⲏⲣⲉⲉϥϭⲟⲛⲧⲉⲓⲁⲕⲱⲃⲉⲧⲃⲉⲡⲉⲥⲙⲟⲩⲛⲧⲁⲓⲥⲁⲁⲕⲥⲙⲟⲩⲉⲣⲟϥⲁⲥⲙⲟⲩⲧⲉⲉⲣⲟϥⲡⲉϫⲁⲥⲛⲁϥ
ϫⲉⲉⲓⲥⲡⲉⲕⲥⲟⲛⲛⲟϭⲥⲉⲣⲟⲕ·ⲉⲧⲃⲉⲡⲉⲥⲙⲟⲩⲛⲧⲁⲓⲥⲁⲁⲕⲥⲙⲟⲩⲉⲣⲟⲕⲛϩⲏⲧϥⲉⲧⲉⲡⲉⲕⲉⲓⲱⲧⲡⲉ·
ⲧⲉⲛⲟⲩϭⲉⲧⲱⲟⲩⲛⲛⲅⲃⲱⲕⲉϩⲣⲁⲓⲉⲧⲙⲉⲥⲟⲡⲟⲧⲁⲙⲓⲁⲛⲧⲥⲩⲣⲓⲁϣⲁⲗⲁⲃⲁⲛⲡⲁⲥⲟⲛⲛⲅⲟⲩⲱϩⲛⲙⲙⲁϥϣⲁⲛⲧⲉⲡϭⲱⲛⲧⲛⲧⲟⲣⲅⲏⲙⲡⲉⲕⲥⲟⲛ·ⲕⲧⲟϥⲉⲃⲟⲗⲙⲙⲟⲕ·ⲙⲏⲡⲟⲧⲉⲛⲧⲁⲣⲁⲧϣⲏⲣⲉⲙⲙⲱⲧⲛⲙⲡⲉⲥⲛⲁⲩⲛⲟⲩϩⲟⲟⲩⲛⲟⲩⲱⲧϩⲓⲟⲩⲥⲟⲡ·
ⲁⲩⲱⲟⲛⲁⲓⲥⲁⲁⲕϩⲱⲛⲉⲧⲟⲟⲧϥⲁϥⲉⲓⲉⲃⲟⲗⲁⲓⲁⲕⲱⲃⲧⲁⲁϥⲉⲧⲉϩⲓⲏⲡⲉϫⲁϥⲉⲃⲱⲕⲉϩⲣⲁⲓⲉⲧⲙⲉⲥⲟⲡⲟⲇⲁⲙⲓⲁ·
ⲁϥⲧⲱⲙⲛⲧⲉⲩⲙⲁ·ⲁϥⲛⲕⲟⲧⲕ·ⲛⲉⲁⲡⲣⲏϩⲱⲧⲡⲉⲣⲟϥ
ⲁϥⲕⲱⲛⲟⲩⲱⲛⲉϩⲁⲧⲉϥⲁⲡⲉ·ⲁϥⲛⲕⲟⲧⲕⲁϥⲡⲱⲱⲣⲉⲛⲟⲩⲣⲁⲥⲟⲩϩⲛⲧⲉⲟⲩϣⲏⲉⲧⲙⲙⲁⲩ·
ⲁⲩⲱⲁϥⲛⲁⲩⲉⲩⲕⲗⲟⲟⲗⲉ·ⲉⲥⲧⲁϫⲣⲏⲩ·ϩⲓϫⲙⲡⲕⲁϩⲉⲣⲉⲧⲉⲥⲁⲡⲉⲡⲏϩϣⲁϩⲣⲁⲓ·ⲉⲧⲡⲉ·
ⲁⲩⲱⲛⲁⲅⲅⲉⲗⲟⲥⲙⲡⲛⲟⲩⲧⲉⲉⲩⲛⲁⲉϩⲣⲁⲓⲁⲩⲱⲉⲩⲛⲏⲩⲉⲡⲉⲥⲏⲧϩⲓⲱⲱⲥ·
ⲡϫⲟⲉⲓⲥⲇⲉⲛϥⲧⲁϫⲣⲏⲩⲉϩⲣⲁⲓⲉϫⲱⲥ·ⲁⲩⲱⲁϥⲟⲩⲱⲛϩⲉⲣⲟϥϩⲛⲧⲉⲟⲩϣⲏⲉⲧⲙⲙⲁⲩⲁϥϣⲁϫⲉⲛⲙⲙⲁϥ·
ⲛⲧⲉⲣⲉϥⲃⲱⲕⲇⲉⲟⲛⲉϩⲣⲁⲓⲉⲧⲙⲉⲥⲟⲡⲟⲇⲁⲙⲓⲁⲛⲧⲥⲩⲣⲓⲁ·ⲁⲡⲛⲟⲩⲧⲉⲟⲛϣⲁϫⲉⲛⲙⲙⲁϥⲛⲧⲉⲩϣⲏϫⲉϥⲓⲉⲓⲁⲧⲕⲉϩⲣⲁⲓⲛⲅⲛⲁⲩϩⲛⲛⲉⲕⲃⲁⲗⲉⲛϭⲓⲛⲉⲓⲙⲛⲛⲟⲉⲓⲗⲉⲛϩⲉⲛⲟⲩⲟⲃϣ·
ⲉⲩϥⲱϭⲉⲉϩⲣⲁⲓⲉϫⲛⲛⲉⲥⲟⲟⲩⲙⲛⲛⲃⲁⲙⲡⲉ·ⲉⲩⲙⲓⲥⲉⲛϩⲉⲛⲁⲩⲉⲓⲛ·ⲁⲩⲉⲓⲉⲓⲛⲛⲕⲣⲙⲉⲥⲛⲥⲓⲟⲩⲥⲓⲟⲩ·
ⲡⲉϫⲉⲡⲛⲟⲩⲧⲉⲇⲉⲛⲁϥⲟⲛϩⲛⲟⲩϩⲟⲣⲟⲙⲁⲛⲧⲉⲩϣⲏϫⲉⲁⲛⲟⲕⲡⲉⲡⲛⲟⲩⲧⲉⲛⲓⲥⲁⲁⲕⲙⲡⲣⲣϩⲟⲧⲉ·
ⲁϣⲁⲓⲛⲅⲁⲓⲁⲓⲛⲅⲙⲉϩⲡⲕⲁϩⲛⲅⲣϫⲥⲉϩⲣⲁⲓⲉϫⲱϥ·
ⲛⲧⲉⲣϥⲥⲙⲟⲩⲇⲉⲟⲛⲉⲣⲟϥϩⲙⲡⲛⲟⲩⲃⲙⲛⲡϩⲁⲧⲙⲛⲛⲉⲥⲟⲟⲩ·ⲙⲛⲛⲃⲁⲁⲙⲡⲉⲙⲛⲛⲧⲃⲛⲟⲟⲩⲉⲧⲏⲣⲟⲩ·
ⲁϥϣⲁϫⲉⲇⲉⲟⲛⲛⲙⲙⲁϥ·ϫⲉⲕⲟⲧⲕⲉϩⲣⲁⲓⲉⲡⲉⲕⲏⲓⲛⲧⲁϣⲱⲡⲉⲛⲙⲙⲁⲕ·
ⲁϥⲕⲟⲧϥⲇⲉⲛϫⲉⲓⲁⲕⲱⲃⲙⲛⲧⲉϥⲥϩⲓⲙⲉⲥⲛⲧⲉ·ⲗⲓⲁⲙⲛϩⲣⲁⲭⲏⲗⲙⲛⲛⲉⲩϣⲏⲣⲉⲙⲛⲛⲉⲩⲧⲃⲛⲟⲟⲩⲉ·
ⲛⲧⲉⲣϥⲡⲱϩⲇⲉⲉⲡⲓⲉⲣⲟ·ϫⲉⲉϥⲛⲁϫⲓⲟⲟⲣⲙⲙⲟϥⲡⲣⲟⲥⲛϣⲁϫⲉⲛⲧⲅⲉⲛⲏⲥⲓⲥⲉⲧⲟⲩⲁⲁⲃⲛⲧⲁϥⲥϩⲁⲓⲥⲟⲩⲛϭⲓⲡⲥⲩⲛⲅⲣⲁⲫⲉⲩⲥⲉⲧⲟⲩⲁⲁⲃⲙⲱⲩⲥⲏⲥ·ⲡⲉϫⲁϥϫⲉⲁⲩⲣⲱⲙⲉⲧⲱⲙ̅ⲛ̅ⲧ̅ⲉⲣⲟϥ·ⲁϥⲙⲓϣⲉⲛⲙⲙⲁϥϣⲁϩⲧⲟⲟⲩⲉ·
ⲛⲧⲉⲣⲉϩⲧⲟⲟⲩⲉⲇⲉϣⲱⲡⲉ·ⲡⲉϫⲁϥⲛⲁϥⲛϭⲓⲓⲁⲕⲱⲃϫⲉⲙⲁⲧⲁⲙⲟⲓⲉⲡⲉⲕⲣⲁⲛ⁛—
ⲡⲉϫⲁϥⲛⲁϥϫⲉⲉⲧⲃⲉⲟⲩⲕϣⲓⲛⲉⲛⲥⲁⲡⲁⲣⲁⲛ·
ⲡⲁⲓⲇⲉⲟⲩϣⲡⲏⲣⲉⲡⲉ·
ⲁⲩⲱⲡⲉϫⲁϥⲛⲁϥϫⲉⲕⲁⲁⲧⲉⲃⲟⲗϫⲉⲁⲡⲟⲩⲟⲉⲓⲛⲉⲓⲉϩⲣⲁⲓ·
ⲡⲉϫⲁϥⲛⲁϥϫⲉⲛϯⲛⲁⲕⲁⲁⲕⲉⲃⲟⲗⲁⲛⲙⲡⲉⲕⲥⲙⲟⲩⲉⲣⲟⲓ·
ⲁⲩⲱⲡⲉϫⲁϥⲛⲁϥϫⲉⲛⲓⲙⲛⲣⲁⲛⲧⲉⲕ·
ⲡⲉϫⲁϥⲛⲁϥϫⲉⲓⲁⲕⲱⲃⲡⲉⲡⲁⲣⲁⲛ·
ⲡⲉϫⲁϥⲛⲁϥϫⲉⲛⲛⲉⲩⲙⲟⲩⲧⲉⲉⲣⲟⲕϫⲉⲓⲁⲕⲱⲃ·ⲁⲗⲗⲁⲡⲓⲥⲣⲁⲏⲗⲡⲉⲧⲛⲁϣⲱⲡⲉⲛⲁⲕⲛⲣⲁⲛϫⲉⲁⲕϭⲙϭⲟⲙⲙⲛⲡⲛⲟⲩⲧⲉⲁⲩⲱⲛⲇⲩⲛⲁⲇⲟⲥⲙⲛⲛⲣⲱⲙⲉ·
ⲁϥϫⲱϩⲇⲉⲉⲡⲡⲱϫⲕⲙⲡⲙⲉⲣⲟⲥⲛⲓⲁⲕⲱⲃⲁϥⲛⲟⲩϣⲥⲛϭⲓⲡⲉϥⲙⲉⲣⲟⲥ·
ⲁⲩⲱⲡⲉϫⲁϥϫⲉⲁⲓⲛⲁⲩⲉⲡⲛⲟⲩⲧⲉⲛϩⲟϩⲓϩⲟ·
ⲁⲥⲟⲩϫⲁⲓⲛϭⲓⲧⲁⲯⲩⲭⲏ·ⲁⲡⲣⲏⲇⲉϣⲁⲉϩⲣⲁⲓⲉϫⲱϥ·ⲛⲧⲉⲣϥⲥⲟⲧϥⲛϭⲓⲡⲉⲓⲛⲉⲙⲡⲛⲟⲩⲧⲉ·
ⲁⲛⲟⲛⲇⲉϩⲱⲱⲛⲱⲛⲁⲙⲉⲣⲁⲁⲧⲉϣϣⲉⲉⲣⲟⲛ·
ⲉϣϫⲉⲁⲡⲛⲟⲩⲧⲉⲕⲁⲧⲁⲝⲓⲟⲩⲙⲙⲟϥ·ⲁϥⲉⲓⲉⲡⲉⲥⲏⲧⲉⲡⲕⲟⲥⲙⲟⲥ·ⲁϥϣⲁϫⲉⲙⲛⲡⲉϥⲡⲗⲁⲥⲙⲁⲉⲧⲃⲉⲡⲧⲁϩⲟⲉⲣⲁⲧϥ·ⲙⲡⲟⲩϫⲁⲓⲛⲧⲉⲩⲯⲩⲭⲏⲡⲟⲥⲟⲙⲁⲗⲗⲟⲛⲛϥⲛⲁⲧⲛⲛⲟⲟⲩⲁⲛ·ⲛⲛⲉϥⲡⲉⲧⲟⲩⲁⲁⲃⲛϥⲥⲗⲥⲱⲗⲟⲩϩⲛⲛⲉⲩϩⲓⲥⲉ·
ⲙⲡⲣⲧⲣⲉⲗⲁⲁⲩϭⲉⲟⲩⲛⲛⲣⲱⲙⲉⲣⲁⲡⲓⲥⲧⲟⲥⲉⲡⲉⲓϣⲁϫⲉⲡⲁⲓⲛⲧⲁⲓϫⲟⲟϥ·ⲉⲧⲃⲉⲡⲡⲉⲧⲟⲩⲁⲁⲃⲁⲡⲁⲡⲉⲥⲉⲛⲑⲓⲟⲥⲡⲉⲡⲓⲥⲕⲟⲡⲟⲥ·ϩⲱⲥϫⲉⲁϥⲙⲡϣⲁⲛⲛⲁⲩⲉϩⲏⲗⲓⲁⲥⲡⲉⲑⲉⲥⲃⲩⲧⲏⲥ·
ϫⲉⲛⲛⲉⲡϣⲁϫⲉⲉⲧⲥⲏϩϫⲱⲕⲉⲃⲟⲗⲉϫⲱϥϫⲉⲁⲡⲛⲟⲩⲧⲉⲧⲱⲙⲙⲡϩⲏⲧⲛⲛⲁⲡⲓⲥⲧⲟⲥⲙⲡⲉⲓⲁⲓⲱⲛ·ϫⲉⲕⲁⲥⲛⲛⲉⲩⲛⲁⲩⲉⲡⲟⲩⲟⲉⲓⲛⲙⲡⲉⲩⲁⲅⲅⲉⲗⲓⲟⲛⲙⲡⲉⲭⲣⲓⲥⲧⲟⲥ·
ⲁⲩⲱⲟⲛϫⲉⲙⲡⲣϣⲱⲡⲉⲉⲧⲉⲧⲛⲙⲟⲟϣⲉⲙⲛⲛⲁⲡⲓⲥⲧⲟⲥ·ⲁⲩⲱⲟⲛϫⲉⲙⲛⲧⲏⲡⲁⲡⲓⲥⲧⲟⲥⲟⲩϩⲟⲃⲟⲗⲟⲥⲛⲟⲩⲱⲧ·
ⲡⲉⲛϫⲟⲉⲓⲥⲇⲉϩⲱⲱϥⲁⲩⲱⲡⲉⲛⲛⲟⲩⲧⲉ·ⲁⲩⲱⲡⲉⲛϫⲟⲉⲓⲥⲁⲩⲱⲡⲉⲛⲥⲏⲣⲱϣⲉⲃⲟⲗϩⲛⲛⲉⲩⲁⲅⲅⲉⲗⲓⲟⲛⲉⲧⲟⲩⲁⲁⲃϩⲛⲧⲉϥⲧⲁⲡⲣⲟⲛⲛⲟⲩⲧⲉ·ⲉⲧⲃⲉⲡⲣⲱⲙⲉⲛⲧⲁϥⲛⲡⲉϥϣⲏⲣⲉϣⲁⲣⲟϥ·
ⲉⲟⲩⲛⲟⲩⲡⲛⲉⲩⲙⲁⲙⲡⲟⲛⲏⲣⲟⲥⲛⲙⲙⲁϥϩⲙⲡⲧⲣⲉϥϫⲛⲉⲡⲉϥⲉⲓⲱⲧ·
ϫⲉⲉⲓⲥⲁⲟⲩⲏⲣⲛⲟⲩⲟⲉⲓϣϫⲓⲛⲛⲧⲁⲡⲁⲓⲧⲁϩⲟϥ·
ⲡⲉϫⲁϥⲇⲉϫⲉϫⲓⲛⲧⲉϥⲙⲛⲧⲕⲟⲩⲓ·ⲁⲩⲱϩⲁϩⲛⲥⲟⲡϣⲁϥⲛⲟϫϥⲉⲡⲙⲟⲟⲩ·ⲁⲩⲱⲉⲡⲕⲱϩⲧϫⲉⲉϥⲉⲙⲟⲟⲩⲧϥ·
ⲁⲗⲗⲁⲃⲟⲏⲑⲉⲓⲉⲣⲟⲛϩⲙⲛⲉⲧⲕⲛⲁⲉϣϭⲙϭⲟⲙ·ⲉⲁⲁϥⲛⲅϣⲛϩⲧⲏⲕϩⲁⲣⲟⲛ·
ⲓⲏⲥⲟⲩⲥⲇⲉⲡⲉϫⲁϥⲛⲁϥϫⲉⲟⲩⲛϭⲟⲙⲛϩⲱⲃⲛⲓⲙⲙⲡⲉⲧⲡⲓⲥⲧⲉⲩⲉ·
ⲁϥϫⲓϣⲕⲁⲕⲉⲃⲟⲗⲛϭⲓⲡⲉⲓⲱⲧⲙⲡϣⲏⲣⲉϣⲏⲙϫⲉϯⲡⲓⲥⲧⲉⲩⲉ·ⲃⲟⲏⲑⲉⲓⲉⲧⲁⲙⲛⲧⲁⲧⲛⲁϩⲧⲉ·
ⲁϥⲉⲡⲉⲓⲧⲏⲙⲁⲇⲉⲛⲡⲉⲡⲛⲉⲩⲙⲁⲙⲡⲟⲛⲏⲣⲟⲛⲛⲧⲉⲩⲛⲟⲩⲁϥⲛⲟϫϥⲉⲃⲟⲗⲛϩⲏⲧϥϩⲓⲧⲛⲧϩⲉⲛⲧⲁⲡⲉϥⲉⲓⲱⲧⲡⲓⲥⲧⲉⲩⲉ·
ϩⲣⲁⲓⲇⲉⲟⲛϩⲛⲧϭⲟⲙⲛⲧⲡⲓⲥⲧⲓⲥ·ⲁⲩⲥϩⲓⲙⲉϯⲡⲉⲥⲟⲩⲟⲓⲉⲣⲟϥⲉⲣⲉⲡⲉⲥⲛⲟϥϩⲁⲣⲟⲥⲙⲙⲛⲧⲥⲛⲟⲟⲩⲥⲛⲣⲟⲙⲡⲉ·ⲧⲁⲓⲉⲧⲉⲙⲡⲉⲗⲁⲁⲩⲉϣϭⲙϭⲟⲙⲉⲧⲁⲗϭⲟⲥ
ⲁⲥϫⲱϩⲙⲙⲁⲧⲉⲉⲡⲧⲟⲡⲙⲡⲉϥϩⲟⲓⲧⲉ·ⲁⲩⲱⲛⲧⲉⲩⲛⲟⲩ·ⲁⲡⲉⲥⲛⲟϥϭⲱⲉϥϣⲟⲩⲟ
ⲉⲁϥϣⲁϫⲉⲛⲙⲙⲁⲥⲉϥϫⲱⲙⲙⲟⲥϫⲉⲧⲟⲩⲡⲓⲥⲧⲓⲥⲧⲉⲛⲧⲁⲥⲛⲁϩⲙⲉ·ⲃⲱⲕϩⲛⲟⲩⲉⲓⲣⲏⲛⲏ·
ⲁϥϣⲁϫⲉⲟⲛⲙⲛⲙⲙⲁⲑⲏⲧⲏⲥϫⲉⲉϣⲱⲡⲉⲟⲩⲛⲧⲏⲧⲛⲡⲓⲥⲧⲓⲥⲙⲙⲁⲩ·ⲛⲁⲡϣⲁⲩⲛⲟⲩⲃⲗⲃⲓⲗⲉⲛϣⲗⲧⲁⲙⲧⲉⲧⲛⲁϫⲟⲟⲥⲙⲡⲉⲓⲧⲟⲟⲩϫⲉⲡⲱⲱⲛⲉⲉⲃⲟⲗϩⲙⲡⲉⲓⲙⲁⲉⲡⲁⲓ·ⲁⲩⲱⲛϥⲡⲱⲱⲛⲉⲛⲧⲉⲧⲙⲗⲁⲁⲩⲣⲁⲧϭⲟⲙⲛⲏⲧⲛ·
ⲁⲩⲱⲟⲛϫⲉⲧⲉⲧⲛⲁϫⲟⲟⲥⲛϯⲛⲱϩⲉϫⲉⲡⲱⲣⲕⲛⲧⲉⲧⲱϭⲉϩⲛⲧϩⲁⲗⲗⲁⲥⲁⲛⲥⲥⲱⲧⲙⲛⲏⲧⲛ·
ⲁⲩϫⲟⲟⲥⲇⲉⲟⲛ·ⲉⲧⲃⲏⲏⲧϥⲛⲧⲟϥⲡⲡⲉⲧⲟⲩⲁⲁⲃ·ⲁⲡⲁⲡⲉⲥⲉⲛⲑⲓⲟⲥ·ϫⲉⲁⲥϣⲱⲡⲉⲙⲡⲉⲟⲩⲟⲉⲓϣⲉϥⲟⲛⲕⲟⲩⲓ·ⲉϥⲙⲟⲟⲛⲉⲛⲛⲉⲥⲟⲟⲩⲙⲡⲉϥⲉⲓⲱⲧⲁⲡⲛⲟⲩⲧⲉⲟⲩⲱⲛⲛⲛⲉϥⲃⲁⲗ·ⲁϥⲛⲁⲩⲉⲩⲥⲧⲩⲗⲗⲟⲥⲛⲕⲱϩⲧϩⲓⲧϩⲏⲙⲙⲟϥ
ⲛⲉⲩⲛϩⲉⲛⲕⲉϣⲏⲣⲉⲇⲉϣⲏⲙ·ⲙⲟⲟⲛⲉⲛⲙⲙⲁϥⲡⲉ·
ⲡⲉϫⲁϥⲛⲛϣⲏⲣⲉϣⲏⲙ·ⲉⲧⲙⲟⲟⲛⲉⲛⲙⲙⲁϥϫⲉⲁⲧⲉⲧⲛⲛⲁⲩⲉⲡⲉⲥⲧⲩⲗⲗⲟⲥⲛⲕⲱϩⲧⲉⲧϩⲓϩⲏ·ⲙⲙⲟⲛ·
ⲡⲉϫⲁⲩⲛⲁϥϫⲉⲙⲡⲉⲛⲛⲁⲩ·
ⲁϥⲱϣⲉⲃⲟⲗⲉϩⲣⲁⲓⲉⲧⲡⲉ·ⲉϥϫⲱⲙⲙⲟⲥϫⲉⲡⲛⲟⲩⲧⲉⲁⲛⲟⲩⲱⲛⲛⲛⲃⲁⲗⲛⲛⲉⲓϣⲏⲣⲉϣⲏⲙⲛⲥⲉⲛⲁⲩⲉⲡⲉⲥⲧⲩⲗⲗⲟⲥⲛⲕⲱϩⲧⲛⲧϩⲉϩⲱⲛⲧⲁⲓⲛⲁⲩⲉⲣⲟϥ⁛—
ⲁⲩⲱⲁⲡⲛⲟⲩⲧⲉⲥⲱⲧⲙⲉⲧⲉϥⲥⲙⲏⲁⲩⲟⲩⲱⲛ·ⲛϭⲓⲛⲉⲩⲃⲁⲗⲁⲩⲛⲁⲩⲉⲣⲟϥ·
ⲁⲧⲉⲧⲛⲛⲁⲩϭⲉⲱⲛⲁⲙⲉⲣⲁⲧⲉϫⲉⲙⲡⲛⲁⲩⲛⲧⲁⲡⲛⲟⲩⲧⲉⲥⲱⲧⲡⲙⲙⲱⲩⲥⲏⲥ·ϫⲓⲛⲧⲉϥⲙⲛⲧⲕⲟⲩⲓⲛⲧⲁϥϣⲁϫⲉⲛⲙⲙⲁϥ·ⲉⲃⲟⲗϩⲛⲟⲩⲥⲧⲩⲗⲗⲟⲥⲛⲕⲱϩⲧⲉⲃⲟⲗϩⲙⲡⲃⲁⲧⲟⲥ⁛
ⲁⲡⲁⲡⲉⲥⲩⲛⲑⲓⲟⲥⲇⲉⲛⲧⲁⲡⲛⲟⲩⲧⲉⲉⲓϣⲁⲣⲟϥϫⲓⲛⲧⲉϥⲙⲛⲧⲕⲟⲩⲓⲉϥⲥⲱⲧⲡⲙⲙⲟϥⲛⲧϩⲉⲛⲥⲁⲙⲟⲩⲏⲗⲛⲧⲁⲧⲉϥⲙⲁⲁⲩⲧⲁⲁϥⲕⲁⲧⲁⲡⲉⲥⲉⲣⲏⲧⲉⲡⲣⲡⲉⲙⲡϫⲟⲉⲓⲥⲕⲁⲧⲁⲧϩⲉⲛⲧⲁϥϫⲟⲟⲥⲛϭⲓⲡϩⲓⲉⲣⲟⲯⲁⲗⲧⲏⲥⲇⲁⲩⲉⲓⲇϫⲉⲙⲱⲩⲥⲏⲥⲟⲩⲁⲁⲃⲙⲛⲁⲁⲣⲱⲛϩⲛⲛⲉϥⲟⲩⲏⲏⲃ·ⲁⲩⲱⲥⲁⲙⲟⲩⲏⲗϩⲛⲛⲉⲧⲉⲡⲓⲕⲁⲗⲉⲓⲙⲡⲉϥⲣⲁⲛ·
ⲁⲩⲱϣⲉⲃⲟⲗⲉϩⲣⲁⲓⲉⲡϫⲟⲉⲓⲥⲁⲩⲱⲛⲧⲟϥⲉϥⲥⲱⲧⲙⲉⲣⲟⲟⲩⲁϥϣⲁϫⲉⲛⲙⲙⲁⲩⲉⲃⲟⲗϩⲛⲟⲩⲥⲧⲩⲗⲗⲟⲥⲛⲕⲗⲟⲟⲗⲉ·ⲁⲩϩⲁⲣⲉϩⲉⲛⲉϥⲙⲛⲧⲙⲛⲧⲣⲉⲁⲩⲱⲛⲉϥⲡⲣⲟⲥⲧⲁⲅⲙⲁⲛⲧⲁϥⲧⲁⲁⲩⲛⲁⲩ·
ⲛⲉⲩⲛⲟⲩⲥⲟⲛⲇⲉⲟⲛϩⲙⲡⲧⲟⲟⲩⲛⲧⲥⲉⲛⲧⲏⲉϥϣⲱⲛⲉⲉⲙⲁⲧⲉ·ⲉⲁⲡⲉϥⲥⲱⲙⲁϭⲃⲃⲉⲉⲃⲟⲗⲙⲡⲱⲥⲕⲙⲡϣⲱⲛⲉ·
ⲁϥⲉⲡⲓⲑⲩⲙⲉⲓⲛⲟⲩϩⲟⲟⲩⲉⲩⲕⲟⲩⲓⲛⲧⲃⲧⲁϥϫⲟⲟⲥⲙⲡⲡⲉⲧⲟⲩⲁⲁⲃⲁⲡⲁⲡⲉⲥⲩⲛⲑⲓⲟⲥ·ⲉⲧⲓⲉϥⲟⲙⲙⲟⲛⲁⲭⲟⲥⲙⲡⲉⲟⲩⲟⲉⲓϣⲉⲧⲙⲙⲁⲩ·ⲙⲡⲁⲧϥⲣⲉⲡⲓⲥⲕⲟⲡⲟⲥ·ϫⲉⲉⲓⲉⲡⲓⲑⲩⲙⲉⲓⲉⲩⲕⲟⲩⲓⲛⲧⲃⲧⲙⲡⲓϩⲉⲉⲣⲟϥ·
ϥⲟⲩⲱϣⲃ·ⲛϭⲓⲡⲡⲉⲧⲟⲩⲁⲁⲃⲁⲡⲁⲡⲉⲥⲩⲛⲑⲓⲟⲥϫⲉⲡⲁⲛⲧⲱⲥⲡⲛⲟⲩⲧⲉⲛⲁⲧⲟϣϥⲛⲁⲕⲙⲡϩⲟⲟⲩ·
ⲛⲉϫⲡⲉⲕⲣⲟⲟⲩϣⲉⲡϫⲟⲉⲓⲥ·ⲁⲩⲱϥⲛⲁⲥⲁⲛⲟϣⲕ·ⲡⲉϫⲁϥⲛϭⲓⲡⲉⲡⲣⲟⲫⲏⲧⲏⲥϫⲉⲛϥⲛⲁⲕⲁⲡⲇⲓⲕⲁⲓⲟⲥⲉⲕⲓⲙϣⲁⲉⲛⲉϩ·
ⲡⲡⲉⲧⲟⲩⲁⲁⲃⲇⲉϩⲱⲱϥⲁⲡⲁⲡⲉⲥⲩⲛⲑⲓⲟⲥⲁϥϫⲓⲙⲡⲉϥⲕⲉⲗⲱⲗϫⲉⲉϥⲛⲁⲙⲟϩϥⲙⲙⲟⲟⲩ·ⲛⲉⲡⲕⲁⲓⲣⲟⲥⲅⲁⲣⲙⲡⲙⲟⲩϩⲙⲡⲙⲟⲩϩⲙⲡⲙⲟⲟⲩⲡⲉ·
ⲛϥⲙⲟⲟϣⲉⲇⲉⲛϭⲓⲡⲡⲉⲧⲟⲩⲁⲁⲃⲁⲡⲁⲡⲉⲥⲩⲛⲑⲓⲟⲥ·ⲉϥⲱϣⲉϩⲣⲁⲓⲉⲡϫⲟⲉⲓⲥϫⲉⲡⲛⲟⲩⲧⲉⲙⲡⲣⲕⲱⲡϩⲏⲧⲙⲡⲉⲓⲥⲟⲛⲉϥⲗⲩⲡⲏ·ⲁⲗⲗⲁⲉϣⲱⲡⲉⲡⲉⲕⲟⲩⲱϣⲡⲉϯⲛⲁϥⲙⲡⲉϥⲁⲓϯⲙⲁ·
ⲙⲡⲣⲕⲁⲁϥⲉϥⲗⲩⲡⲏⲡϫⲟⲉⲓⲥ·
ⲛⲧⲉⲣⲉϥⲃⲱⲕⲇⲉⲉⲃⲟⲗⲉϫⲙⲡⲧⲏⲛⲉ·ⲉⲙⲉϩⲙⲟⲟⲩⲁⲩⲛⲟϭⲇⲉⲙⲙⲟⲟⲩϣⲱⲡⲉ·ⲉⲁⲡⲛⲟⲩⲧⲉϭⲙⲡϣⲓⲛⲉⲙⲡⲕⲁϩⲧⲉⲣⲟⲙⲡⲉⲉⲧⲙⲙⲁⲩⲁϥϭⲱϣⲧⲇⲉⲛϭⲓⲁⲡⲁⲡⲉⲥⲩⲛⲑⲓⲟⲥ·
ⲁϥⲛⲁⲩⲉⲩⲛⲟϭⲛⲧⲃⲧⲉϥⲡⲟⲥϣϩⲙⲡⲙⲟⲟⲩⲉϥϩⲗⲟⲓⲗⲉ·
ⲱⲧⲉⲓⲛⲟϭⲛϣⲡⲏⲣⲉⲛⲧⲉⲡⲛⲟⲩⲧⲉ·ⲉⲡⲙⲁⲉⲧⲣⲉⲡⲙⲁⲕⲁⲣⲓⲟⲥⲁⲡⲁⲡⲉⲥⲩⲛⲑⲓⲟⲥⲃⲱⲕⲉⲃⲟⲗϩⲙⲡⲙⲟⲟⲩⲛϥⲥⲕⲡⲧⲃⲧⲉⲡⲉⲕⲣⲟ·ⲁⲡⲙⲟⲩⲛϩⲁⲁⲧⲉⲛⲙⲙⲟⲩⲛⲉⲓⲟⲟⲩⲉⲥⲟⲕϥⲁϥⲛⲧϥⲉⲡⲙⲁⲉⲧⲙⲙⲁⲩ·
ⲉⲧⲓⲉϥⲛⲁⲙⲟⲩϩⲡⲉϥⲕⲉⲗⲱⲗⲙⲙⲟⲟⲩⲕⲁⲧⲁⲧϩⲉⲛⲧⲁϥϩⲟⲙⲟⲗⲟⲅⲉⲓⲛⲁⲛ·ϩⲛⲧⲉϥⲧⲁⲡⲣⲟ·ⲉϥⲣⲙⲛⲧⲣⲉⲛⲁⲛⲁϥϫⲓⲧϥϭⲉⲁϥⲧⲁⲁϥⲙⲡⲥⲟⲛⲡⲉϫⲁϥⲛⲁϥ·ϫⲉⲁⲡⲛⲟⲩⲧⲉϫⲉⲕⲡⲉⲕⲁⲓⲧⲏⲙⲁⲉⲃⲟⲗ·
ⲡⲉⲛⲧⲁϥⲧⲛⲛⲟⲟⲩⲙⲡⲁⲣⲓⲥⲧⲟⲛⲛⲇⲁⲛⲓⲏⲗⲛϥϭⲱϣⲧϩⲏⲧϥⲁⲛ·
ⲡⲉϫⲁϥϫⲉⲛⲧⲟϥⲟⲛⲡⲉⲛⲧⲁϥⲥⲃⲧⲉⲡⲧⲃⲧⲛⲁⲕ·ⲙⲡϩⲟⲟⲩϩⲙⲡⲉϥⲟⲩⲱϣ·ⲉⲡⲉⲓⲇⲏⲙⲡⲉϥⲕⲁⲁⲕⲉⲗⲩⲡⲏ·ϩⲙⲡⲉⲛⲧⲁⲕⲁⲓⲧⲉⲓⲙⲙⲟϥ·ⲛⲧⲟⲟⲧϥ·
ⲁⲗⲏⲑⲟⲥⲕⲁⲗⲱⲥⲁϥϫⲟⲟⲥⲛϭⲓⲡⲉⲡⲣⲟⲫⲏⲧⲏⲥϫⲉⲡϫⲟⲉⲓⲥϩⲏⲛⲉϩⲟⲩⲛⲉⲟⲩⲟⲛⲛⲓⲙ·ⲉⲧⲱϣⲉϩⲣⲁⲓⲉⲣⲟϥϩⲛⲟⲩⲙⲉ·
ⲁⲩⲱϥⲛⲁⲥⲱⲧⲙⲉⲡⲉⲩⲥⲟⲡⲥⲡⲛϥⲧⲟⲩϫⲟⲟⲩ·
ⲡϫⲟⲉⲓⲥⲛⲁϩⲁⲣⲉϩⲉⲟⲩⲟⲛⲉⲧⲙⲉⲙⲙⲟϥ⁛—
ⲛⲧⲉⲣⲉⲛϣⲏⲣⲉⲙⲡⲓⲥⲣⲁⲏⲗⲧⲱⲟⲩⲛⲉϫⲙⲙⲱⲩⲥⲏⲥ·ⲙⲛⲁⲁⲣⲱⲛⲡⲉϫⲁⲩⲛⲁϥϫⲉⲟⲩⲡⲉⲡⲁⲓⲛⲧⲁⲕⲁⲁϥⲛⲁⲛ·
ⲁⲕⲛⲧⲛⲉϩⲣⲁⲓϩⲙⲡⲕⲁϩⲛⲕⲏⲙⲉ·
ⲉⲛϩⲙⲟⲟⲥⲉϩⲣⲁⲓⲉϫⲛⲛⲉⲭⲁⲗⲕⲓⲟⲛⲛⲁⲁϥ·ⲁⲩⲱⲉⲛⲟⲩⲉⲙⲟⲉⲓⲕ·ⲉⲩⲥⲉⲓⲧⲉⲛⲟⲩⲙⲁⲛⲁⲛⲛϩⲉⲛⲟⲉⲓⲕⲙⲛϩⲉⲛⲁⲁϥ·
ⲉϣⲱⲡⲉⲙⲙⲟⲛⲧⲛⲛⲁϩⲓⲱⲛⲉⲉⲣⲱⲧⲛⲁⲩⲱⲁⲥϫⲟⲟⲥ·ⲛϭⲓⲧⲥⲩⲛⲁⲅⲱⲅⲏⲧⲏⲣⲥⲉϩⲓⲱⲛⲉⲉⲣⲟⲟⲩ·
ⲁⲩⲱⲙⲱⲩⲥⲏⲥⲁϥϫⲓϣⲕⲁⲕⲉⲃⲟⲗⲉϩⲣⲁⲓⲉⲡϫⲟⲉⲓⲥⲉϥϫⲱⲙⲙⲟⲥϫⲉⲡϫⲟⲉⲓⲥⲉⲓⲛⲁϩⲉⲉⲁϥⲧⲱⲛⲙⲡⲉⲓⲗⲁⲟⲥⲉⲧⲣⲉⲩⲟⲩⲱⲙ·
ⲉⲧⲓⲕⲉⲕⲟⲩⲓⲡⲉⲛⲥⲉϩⲓⲱⲛⲉⲉⲣⲟⲓ·
ⲁⲩⲱⲡⲉϫⲉⲡϫⲟⲉⲓⲥⲙⲙⲱⲩⲥⲏⲥϫⲉⲁⲓⲥⲱⲧⲙⲉⲡⲉⲕⲣⲙⲣⲙⲛⲛϣⲏⲣⲉⲙⲡⲓⲥⲣⲁⲏⲗⲛⲧⲁⲩⲁⲁϥⲉϩⲟⲩⲛⲉⲣⲱⲧⲛ
ϩⲱⲛⲇⲉⲉⲧⲟⲟⲧⲟⲩⲛⲛϣⲏⲣⲉⲙⲡⲓⲥⲣⲁⲏⲗⲉⲕϫⲱⲙⲙⲟⲥϫⲉⲥⲃⲧⲉⲧⲏⲩⲧⲛⲛⲣⲁⲥⲧⲉ·ⲛⲧⲉⲧⲛⲟⲩⲉⲙⲁⲁϥ⁛—ⲟⲩⲇⲉⲥⲛⲁⲩⲁⲛⲛⲉ·ⲁⲩⲇⲉϣⲟⲙⲛⲧⲁⲛ·ⲟⲩⲇⲉⲙⲏⲧⲛϩⲟⲟⲩⲁⲛⲛⲉϣⲁϩⲣⲁⲓⲉⲩⲉⲃⲟⲧⲛϩⲟⲟⲩⲉⲧⲉⲧⲛⲛⲁⲟⲩⲱⲙϣⲁⲛⲧϥⲉⲓⲉⲃⲟⲗϩⲛⲛⲉⲧⲛϭⲃϣⲁ
ⲁⲩⲱⲁϥϫⲓⲟⲟⲣⲛⲟⲩϩⲩⲡⲡⲏⲣⲉϩⲛⲧϩⲁⲗⲁⲥⲥⲁⲛⲁⲙⲁϩⲉⲥⲛⲁⲩⲉϫⲙⲡⲕⲁϩ⁛—
ⲁⲧⲉⲧⲛⲉⲓⲙⲉϭⲉⲱⲛⲁⲙⲉⲣⲁⲁⲧⲉϫⲉⲡⲥⲟⲡⲥⲡⲙⲡⲇⲓⲕⲁⲓⲟⲥϭⲙϭⲟⲙⲉⲙⲁⲧⲉ·ⲁⲩⲱⲉϥⲉⲛⲣⲅⲉⲓⲕⲁⲧⲁⲡⲉⲧⲥⲏϩ·
ⲙⲱⲩⲥⲏⲥⲙⲉⲛⲡⲛⲟⲙⲟⲑⲉⲧⲏⲥⲛⲧⲡⲁⲗⲁⲓⲁⲛⲧⲉⲩⲛⲟⲩⲛⲧⲁϥⲉⲡⲓⲕⲁⲗⲉⲓⲙⲡϫⲟⲉⲓⲥⲉⲧⲃⲉⲡⲙⲏⲏϣⲉ·ⲁϥⲉⲓⲣⲉⲕⲁⲧⲁⲡⲉϥⲟⲩⲱϣ⁛
ⲡⲛⲟⲙⲟⲑⲉⲧⲏⲥⲇⲉϩⲱⲱϥⲛⲧⲇⲓⲁⲑⲏⲕⲏⲛⲃⲣⲣⲉⲁⲡⲁⲡⲉⲥⲩⲛⲑⲓⲟⲥ·
ⲛⲧⲉⲩⲛⲟⲩⲛⲧⲁϥⲥⲡⲥⲡⲡϫⲟⲉⲓⲥⲉⲧⲃⲉⲡⲥⲟⲛⲙⲙⲟⲛⲁⲭⲟⲥⲙⲡⲉϥⲗⲩⲡⲏⲙⲙⲟϥ·ⲁⲗⲗⲁⲁϥϫⲉⲕⲡⲉϥⲁⲓⲧⲏⲙⲁⲉⲃⲟⲗⲕⲁⲧⲁⲧϩⲉⲉⲧⲥⲏϩϩⲛⲛⲉⲯⲁⲗⲙⲟⲥ·ϫⲉⲉⲣⲉⲡϫⲟⲉⲓⲥϫⲱⲕⲉⲃⲟⲗⲛⲛⲉⲕⲁⲓⲧⲏⲙⲁⲧⲏⲣⲟⲩ⁛—
ⲥⲱⲧⲙⲇⲉⲟⲛⲉϯⲕⲉⲛⲟϭⲛϣⲡⲏⲣⲉⲛⲧⲁⲥϣⲱⲡⲉⲉⲃⲟⲗϩⲓⲧⲟⲟⲧϥⲙⲡⲡⲉⲧⲟⲩⲁⲁⲃⲁⲡⲁⲡⲉⲥⲩⲛⲑⲓⲟⲥⲉϥⲟⲙⲙⲟⲛⲁⲭⲟⲥⲙⲡⲁⲧϥⲣⲉⲡⲓⲥⲕⲟⲡⲟⲥ
ⲁϥⲃⲱⲕⲇⲉⲟⲛⲛⲟⲩϩⲟⲟⲩⲉϫⲛⲧϣⲱⲱⲧⲉⲉⲧⲉⲣⲉⲛⲉⲥⲛⲏⲩⲥⲉⲙⲟⲟⲩⲛϩⲏⲧⲥϫⲉⲉϥⲛⲁⲙⲉϩⲡⲉϥⲕⲉⲗⲱⲗⲙⲙⲟⲟⲩ·
ⲛⲧⲉⲣⲉϥⲃⲱⲕⲇⲉⲟⲛⲉϫⲛⲧϣⲱⲱⲧⲉⲁϥⲣⲡⲱⲃϣⲙⲡⲛⲟⲩϩⲙⲛⲧⲃⲏⲥⲉⲙⲡϥϥⲓⲧⲟⲩⲛⲙⲙⲁϥ·
ⲛⲧⲉⲣϥⲁⲁϩⲇⲉⲉⲣⲁⲧϥⲉϫⲛⲧϣⲱⲱⲧⲉⲁϥϣⲗⲏⲗⲉϩⲣⲁⲓⲉⲡϫⲟⲉⲓⲥⲕⲁⲧⲁⲡⲉⲑⲟⲥⲛⲛⲉⲥⲛⲏⲩ·ⲁⲩⲱⲡⲉϫⲁϥϫⲉⲡϫⲟⲉⲓⲥⲛⲧⲟⲕⲉⲧⲥⲟⲟⲩⲛϫⲉⲙⲛϣϭⲟⲙⲙⲙⲟⲓⲉⲧⲣⲁⲕⲧⲟⲓ·ⲛⲕⲉⲥⲟⲡⲉϩⲟⲩⲛⲉⲧϩⲉⲛⲉⲉⲧⲉ·ⲉϫⲓⲙⲡⲛⲟⲩϩ
ⲉⲕⲉⲟⲩⲉϩⲥⲁϩⲛⲉϭⲉⲙⲡⲉⲓⲙⲟⲟⲩⲛϥⲉⲓⲉϩⲣⲁⲓϣⲁⲣⲟⲓⲛⲧⲁϭⲛⲧϩⲉⲙⲙⲟⲩϩⲙⲡⲁⲕⲉⲗⲱⲗⲙⲙⲟⲟⲩϫⲉⲕⲁⲥⲉⲓⲛⲁⲣϩⲙϩⲁⲗⲛⲁⲕⲙⲡⲥⲉⲉⲡⲉⲛⲛⲁϩⲟⲟⲩ·
ⲛⲧⲟⲕⲅⲁⲣⲁⲕⲟⲩⲉϩⲥⲁϩⲛⲉⲙⲡⲉⲕⲁⲡⲟⲥⲧⲟⲗⲟⲥⲡⲉⲧⲣⲟⲥϫⲉⲙⲟⲟϣⲉⲉϩⲣⲁⲓⲉϫⲙⲡⲙⲟⲩ·
ⲛⲧⲉⲣⲉϥϫⲱⲕⲇⲉⲉⲃⲟⲗⲙⲡⲉϣⲗⲏⲗⲁⲡⲙⲟⲟⲩⲙⲟⲟϣⲉ·ⲉⲡϫⲓⲥⲉϣⲁⲛⲧϥⲉⲓⲉϩⲣⲁⲓⲉⲣⲱⲥⲛⲧϣⲱⲧⲉ·ⲛϥⲙⲉϩⲡⲉϥⲕⲉⲗⲱⲗⲙⲙⲟⲟⲩ·
ⲁⲩⲱⲡⲉϫⲁϥⲙⲡⲙⲟⲟⲩϫⲉⲡϫⲟⲉⲓⲥⲡⲉⲧⲟⲩⲉϩⲥⲁϩⲛⲉⲛⲁⲕϫⲉⲛⲧⲟⲕⲉⲡⲉⲥⲏⲧⲉⲡⲉⲕⲙⲁ·
ⲉⲧⲓⲇⲉⲉⲣⲉⲡⲙⲟⲟⲩⲥⲉⲕⲉⲡⲉⲥⲏⲧⲁⲩϣⲱⲥ·ⲉϥⲙⲟⲟⲛⲉⲙⲡⲉϥⲟϩⲉⲛⲉⲥⲟⲟⲩϩⲙⲡϣⲟⲛⲧⲉϯⲡⲉϥⲟⲩⲟⲓⲉⲣⲛⲧⲧⲁⲡⲣⲟⲛⲧϣⲱⲧⲉⲁϥⲑⲉⲱⲣⲉⲓⲙⲡⲙⲟⲟⲩⲉϥⲕⲱⲧⲉⲉϥⲕⲱⲧⲉϩⲛⲧϣⲱⲧⲉϣⲁⲛⲧϥⲃⲱⲕⲉⲡⲉⲥⲏⲧⲉⲡⲉϥⲙⲁ·
ⲉⲓⲛⲁⲧⲛⲧⲱⲛⲅⲉⲛⲓⲙⲱⲡⲙⲁⲕⲁⲣⲓⲟⲥⲁⲡⲁⲡⲉⲥⲩⲛⲑⲓⲟⲥ·
ⲁⲗⲏⲑⲱⲥⲉⲕⲧⲛⲧⲱⲛⲉⲙⲱⲩⲥⲏⲥⲡⲛⲟⲙⲟⲑⲉⲧⲏⲥⲡⲉⲛⲧⲁϥⲧⲣⲉⲑⲁⲗⲗⲁⲥⲁⲡⲱⲣϫⲉⲡⲉⲓⲥⲁⲙⲛⲡⲁⲓ·ⲁⲛϣⲏⲣⲉⲙⲡⲓⲥⲣⲁⲏⲗⲙⲟⲟϣⲉϩⲣⲁⲓⲛϩⲏⲧⲥⲕⲁⲧⲁⲡⲡⲉⲧϣⲟⲩⲱⲟⲩ·
ⲉⲁⲡⲙⲟⲟⲩϣⲱⲡⲉⲛⲁⲩⲛⲥⲟⲃⲧϩⲙⲡⲓⲥⲁⲙⲛⲡⲁⲓⲛⲥⲁⲟⲩⲛⲁⲙ·ⲁⲩⲱⲛⲥⲁϩⲃⲟⲩⲣⲙⲙⲟⲟⲩ·
ⲡⲉⲛⲧⲁϥϣⲁϫⲉⲙⲛⲧⲡⲉⲧⲣⲁ·ⲁⲥⲧⲁⲩⲟⲉⲃⲟⲗⲛϩⲉⲛⲟⲑⲉⲙⲙⲟⲟⲩ⁛—
ⲛⲧⲟⲕⲇⲉϩⲱⲱⲕⲱⲡⲡⲉⲧⲟⲩⲁⲁⲃⲁⲡⲉⲕϣⲗⲏⲗⲃⲱⲕⲉϩⲣⲁⲓϣⲁⲧϩⲁⲯⲓⲥⲛⲧⲡⲉ·ⲁⲥϫⲱⲕⲉⲃⲟⲗⲛϭⲓⲧⲉⲅⲣⲁⲫⲏⲉⲧϫⲱⲙⲙⲟⲥ·ϫⲉⲛⲧⲟϥⲡⲉⲛⲧⲁϥϫⲟⲟⲥⲁⲩϣⲱⲡⲉ·ⲁⲩⲱⲛⲧⲟϥⲡⲉⲛⲧⲁϥϩⲱⲛⲁⲩⲱⲁⲩⲥⲱⲛⲧ·
ⲁⲕϣⲱⲡⲉⲛⲑⲉⲱⲣⲓⲕⲟⲥⲛⲧϩⲉⲛⲛⲉⲡⲣⲟⲫⲏⲧⲏⲥ·ⲁⲩⲱⲛⲛⲟⲉⲣⲟⲥⲛⲧϩⲉⲛⲛⲁⲡⲟⲥⲧⲟⲗⲟⲥ·ⲁⲕϣⲱⲡⲉⲛⲟⲓⲕⲟⲛⲟⲙⲟⲥⲙⲡⲓⲥⲧⲟⲥ
ⲉⲧⲃⲉⲡⲁⲓⲁⲕⲙⲡϣⲁⲛⲧⲉⲕⲕⲗⲏⲥⲓⲁⲛⲛⲉⲧⲟⲩⲁⲁⲃ·
ⲁⲡⲛⲟⲩⲧⲉⲧⲁⲛϩⲟⲩⲧⲕⲉⲩⲙⲏⲏϣⲉⲙⲯⲩⲭⲏ·
ⲁⲕⲉⲩⲁⲅⲅⲉⲗⲓⲍⲉⲛⲧϩⲉⲙⲡⲁⲩⲗⲟⲥⲁⲩⲱⲛⲉⲕⲧⲁϣⲉⲟⲉⲓϣ·ϩⲛⲧⲉⲕⲥⲟⲫⲓⲁⲛⲧⲡⲓⲥⲧⲓⲥⲛⲟⲣⲑⲟⲇⲟⲝⲟⲥ·ⲁⲩⲱⲛⲉⲕϫⲓϣⲕⲁⲕⲉⲃⲟⲗϩⲛⲛⲉⲕⲗⲟⲅⲟⲥⲛⲧϩⲉⲛⲟⲩⲕⲩⲣⲓⲝⲉⲕⲱϣⲉⲃⲟⲗϩⲛⲧⲉⲕⲥⲟⲫⲓⲁ⁛—ⲛⲧϩⲉⲛⲟⲩⲥⲁⲗⲡⲓⲅⲝ⁛
ⲛⲓⲙⲡⲉⲧⲛⲁϣⲧⲁⲓⲟⲕⲕⲁⲧⲁⲡⲉⲕⲙⲡϣⲁ·ⲱⲡⲇⲓⲕⲁⲓⲟⲥⲉⲧⲟⲩⲁⲁⲃ
ϣⲁⲕⲉⲓⲙⲉⲅⲁⲣⲉⲛⲉϩⲏⲡϩⲁⲧϩⲏⲙⲡⲁⲧⲟⲩϣⲱⲡⲉ⁛—
ⲛⲉⲕϣⲁϫⲉⲙⲛⲛⲕⲟⲥⲙⲓⲕⲟⲛϩⲛϩⲉⲛⲱⲇⲏⲙⲛϩⲉⲛⲡⲁⲣⲁⲃⲟⲗⲏ·ⲁⲩⲱⲛⲉⲕϣⲁϫⲉⲙⲛⲙⲙⲱⲛⲁⲭⲟⲥϩⲛϩⲉⲛⲃⲱⲗⲙⲡⲛⲉⲩⲙⲁⲧⲓⲕⲟⲛ·
ⲛⲉⲕϣⲁϫⲉⲡⲉⲙⲛⲛⲁⲣⲭⲱⲛ·ϩⲛϩⲉⲛⲡⲁⲣⲁⲡⲟⲗⲏ·ⲁⲩⲱϩⲛϩⲉⲛⲙⲩⲥⲧⲏⲣⲓⲟⲛ·
ⲉⲙⲉⲕϣⲓⲡⲉϩⲏⲧϥⲛⲗⲁⲁⲩⲛⲣⲱⲙⲉⲉⲧⲙϫⲉⲧⲙⲉⲛⲁⲩⲕⲁⲧⲁⲡⲉⲧⲥⲏϩ·ϫⲉⲛⲉⲓϣⲁϫⲉϩⲛⲛⲉⲕⲙⲛⲧⲙⲛⲧⲣⲉⲙⲡⲙⲧⲟⲉⲃⲟⲗⲛⲛⲣⲣⲱⲟⲩ·ⲛϯϣⲓⲡⲉⲁⲛ·
ⲛⲉⲕⲕⲁⲑⲏⲅⲉⲓⲡⲉⲛⲛⲉⲧⲛⲏⲩϣⲁⲣⲟⲕ·ϣⲁⲣⲟⲕⲧⲏⲣⲟⲩⲡⲉⲉⲣⲡⲓⲥⲧⲟⲥ·
ⲁⲩⲱⲛⲅⲥⲱⲟⲩϩⲉⲣⲟⲕⲛⲟⲩⲟⲛⲛⲓⲙ·ϩⲛⲧⲙⲣⲣⲉⲛⲧⲉⲕⲁⲅⲁⲡⲏ·
ⲁⲕⲥⲱⲧⲙⲉⲧⲉⲛⲧⲟⲗⲏⲙⲡⲉⲭⲣⲓⲥⲧⲟⲥ·ⲁⲕⲕⲱⲧⲙⲡⲉⲕⲏⲓ·ⲉϫⲛⲧⲡⲉⲧⲣⲁⲉⲧⲟⲩⲁⲁⲃ⁛—
ⲁⲕϯⲕⲁⲣⲡⲟⲥϩⲛⲟⲩϩⲩⲡⲟⲙⲟⲛⲏⲙⲛⲟⲩϩⲏⲧⲉϥⲟⲩⲁⲁⲃ·ⲁⲩⲱⲉⲛⲁⲛⲟⲩϥ·
ⲁⲕⲑⲉⲱⲣⲉⲓⲙⲡⲁⲣⲓⲥⲧⲟⲛⲙⲡⲛⲉⲩⲙⲁⲧⲓⲕⲟⲛ·ⲉⲧⲃⲉⲡⲁⲓⲁⲕⲙⲧⲟⲛⲙⲙⲟⲕϩⲙⲡⲇⲉⲓⲡⲛⲟⲛⲉⲧⲟⲩⲁⲁⲃ⁛
ⲁⲕϣⲓⲛⲉⲡⲉⲛϣⲱⲥⲁⲩⲱⲙⲙⲁⲙⲙⲟⲟⲛⲉⲉⲛⲁⲛⲟⲩϥ·ⲉⲧⲃⲉⲡⲁⲓⲟⲛⲛⲉⲕϥⲓⲙⲡⲣⲟⲟⲩϣⲛⲛϩⲏⲕⲉⲛⲟⲩⲟⲉⲓϣⲛⲓⲙ·
ⲁⲕⲁⲙⲁϩⲧⲉⲛⲛϩⲓⲏⲩⲛⲧⲙⲛⲧⲣⲉϥϣⲙϣⲉⲛⲟⲩⲧⲉ·ⲉⲧⲃⲉⲡⲁⲓⲁⲕϣⲱⲡⲉⲛⲕⲩⲃⲉⲣⲛⲓⲧⲏⲥⲙⲡⲡⲉⲗⲁⲅⲟⲥ·ⲛⲙⲙⲩⲥⲧⲏⲣⲓⲟⲛⲉⲧⲟⲩⲁⲁⲃ·ⲁⲩⲱⲛϩⲁⲅⲓⲟⲥⲛⲧϩⲉⲙⲡϣⲟⲙⲛⲧⲛϣⲏⲣⲉϣⲏⲙ⁛—
ⲁⲩⲱⲛⲉⲓⲱⲧⲛϩⲁϩⲛϩⲏⲕⲉϩⲙⲡⲉⲛⲟⲩⲟⲉⲓϣⲁⲩⲱⲛⲉⲓⲱⲧⲛⲛⲟⲣⲫⲁⲛⲟⲥϩⲛⲛⲉⲛϩⲟⲟⲩ·
ⲛⲉⲕⲕⲩⲣⲓⲍⲉⲡⲉⲛⲟⲩⲉⲓⲣⲏⲛⲏⲛⲛⲉⲧⲙⲡⲟⲩⲉ·ⲱⲡⲙⲁⲓⲛⲟⲩⲧⲉⲛⲉⲓⲱⲧⲁⲡⲁⲡⲉⲥⲩⲛⲑⲓⲟⲥ
ⲁⲩⲱⲛⲉⲕⲅⲩⲙⲛⲁⲍⲉⲛⲛⲉⲓϩⲏⲛⲉⲣⲟⲕϩⲛⲧⲉⲥⲃⲱⲉⲧⲟⲩⲟϫ·
ⲁⲕϣⲱⲡⲉⲛⲁⲕⲟⲣⲁⲓⲟⲥ·ⲙⲡⲛⲉⲩⲙⲁⲧⲓⲕⲟⲛ·ⲉⲧⲃⲉⲡⲁⲓⲛⲅⲭⲁⲣⲓⲍⲉⲛⲛⲉⲕⲁⲅⲁⲑⲟⲛ·ⲛⲟⲩⲟⲛⲛⲓⲙϩⲛⲟⲩⲛⲟϭⲛⲟⲩⲣⲟⲧ·
ⲁⲕϣⲓⲛⲉⲁⲕϭⲓⲛⲉⲱⲡⲙⲁⲓⲛⲟⲩⲧⲉ·ⲛⲉⲓⲱⲧⲁⲡⲁⲡⲉⲥⲩⲛⲑⲓⲟⲥⲡⲁⲕⲉⲗⲁⲣⲭⲏⲥⲛⲧⲁⲗⲏⲑⲉⲓⲁ·
ⲁⲕⲧⲱϩⲙⲁⲩⲟⲩⲱⲛⲛⲁⲕ·ⲁⲕⲁⲓⲧⲉⲓⲁⲡⲛⲟⲩⲧⲉ·ϯⲛⲁⲕⲛⲛⲉⲕⲁⲓⲧⲏⲙⲁⲧⲏⲣⲟⲩ
ⲁⲩⲛⲟϭⲛϩⲓⲛⲟⲩϥⲉ·ϩⲙⲡⲉⲕⲥⲏⲩ·ⲁⲩⲛⲟϭⲛⲕⲁⲧⲁⲥⲧⲁⲥⲓⲥϣⲱⲡⲉⲛⲛⲉⲭⲣⲓⲥϯⲁⲛⲟⲥ·
ⲁⲧⲉⲕⲕⲗⲏⲥⲓⲁϣⲱⲡⲉϩⲛⲟⲩϩⲉⲛⲟⲩϥⲉϩⲛⲛⲉⲕϩⲟⲟⲩⲙⲛⲧⲉⲕⲅⲉⲛⲉⲁ·
ⲁⲡⲉⲕⲗⲁⲟⲥⲉⲩⲫⲣⲁⲛⲉϩⲛⲧⲉⲕⲥⲟⲫⲓⲁ·ⲁⲩⲱⲁⲩⲧⲉⲗⲏⲗⲙⲙⲟⲟⲩⲛϭⲓⲛⲉⲕϣⲏⲣⲉϩⲛⲛⲉⲕⲙⲩⲥⲧⲏⲣⲓⲟⲛⲉⲧⲟⲩⲁⲁⲃ⁛—
ⲛⲉⲩⲉⲡⲓⲑⲩⲙⲉⲓⲉⲛⲉⲕⲗⲟⲅⲟⲥⲛϭⲓⲛⲁⲣⲭⲱⲛ·ⲁⲩⲱⲛⲉⲩϣⲓⲛⲉⲛⲥⲁⲛⲉⲕⲙⲩⲥⲧⲏⲣⲓⲟⲛⲛϭⲓⲛⲉⲡⲣⲟⲥⲏⲗⲓⲧⲟⲥⲧⲏⲣⲟⲩ·
ⲁⲕⲑⲉⲱⲣⲉⲓⲙⲡⲣⲱⲙⲉⲡⲁⲓⲉⲧⲉⲁⲛⲁⲧⲟⲗⲏⲥⲧⲉⲡⲉϥⲣⲁⲛ·
ⲉⲧⲃⲉⲡⲁⲓⲁϥⲙⲟϩⲕⲉⲃⲟⲗϩⲙⲡⲗⲁⲙⲡⲣⲟⲛⲙⲡⲉⲡⲛⲉⲩⲙⲁⲉⲧⲟⲩⲁⲁⲃ
ⲁⲕϫⲱⲕⲉⲃⲟⲗⲛⲧⲕⲓⲃⲱⲇⲟⲥⲙⲡⲉⲡⲛⲉⲩⲙⲁⲉⲧⲟⲩⲁⲁⲃⲛⲟⲩⲙⲁϩⲉⲛⲟⲩϣⲓⲏⲛⲧϩⲉⲛⲛⲱϩⲉ·
ⲁⲕϣⲱⲡⲉⲛⲟⲩⲗⲁⲙⲡⲁⲥ·ⲉⲥⲣⲟⲩⲟⲉⲓⲛϩⲙⲡⲉⲛⲧⲟϣⲧⲏⲣϥ·
ⲁⲧⲇⲓⲕⲁⲓⲟⲥⲩⲛⲏⲙⲛϯⲣⲏⲛⲏⲣⲟⲩⲟⲉⲓⲛϩⲁⲧⲉⲕϩⲏ·ϩⲛⲛⲉⲕϩⲟⲟⲩⲧⲏⲣⲟⲩ·
ϩⲛⲛⲉⲕϩⲟⲟⲩⲇⲉⲟⲛⲁⲧⲥⲉⲛϯϣⲱⲡⲉⲛⲟⲩⲣⲉϥⲣⲟⲩⲟⲉⲓⲛϩⲓⲧⲛⲛⲉⲕϣⲗⲏⲗⲙⲛⲙⲡⲉⲧⲟⲩⲁⲁⲃⲛⲧⲁⲩϣⲱⲡⲉⲛϩⲏⲧⲥ·ⲉⲧⲉⲁⲡⲁⲕⲟⲗⲗⲟⲑⲟⲥⲡⲉ·ⲙⲛⲁⲡⲁⲡⲁϩⲁⲙ·ⲛⲉⲓⲛⲟϭⲙⲡⲉⲧⲟⲩⲁⲁⲃ·
ⲁⲩⲉⲓⲥϭⲉⲟⲛⲧⲉⲛⲟⲩϩⲓⲧⲛⲧⲉⲭⲁⲣⲓⲥⲙⲡⲛⲟⲩⲧⲉⲛⲧⲛϫⲱⲉⲣⲱⲧⲛⲛⲕⲉϣⲡⲏⲣⲉⲉⲁⲛⲥⲟⲧⲙⲉⲥⲛⲧⲟⲟⲧⲟⲩⲛⲛⲉⲧⲉⲣⲉⲧⲉⲩϩⲉⲗⲡⲓⲥⲧⲏⲣⲥⲧⲉⲧⲙⲉ·
ⲁⲩⲣⲱⲙⲉⲇⲉⲉⲃⲟⲗϩⲙⲡⲉⲛⲧⲟϣϣⲁϫⲉⲛⲙⲙⲁⲛⲉⲧⲃⲏⲏⲧϥⲛⲧⲟϥⲡⲡⲉⲧⲟⲩⲁⲁⲃⲁⲡⲁⲡⲉⲥⲩⲛⲑⲓⲟⲥ·ϫⲉⲁⲓⲃⲱⲕⲁⲓϫⲓⲥⲙⲟⲩⲛⲧⲟⲟⲧϥⲛϩⲟⲟⲩ·
ⲛⲧⲉⲣⲉϥⲉⲓⲇⲉⲉⲃⲟⲗϩⲓⲧⲟⲟⲧϥⲁⲓⲁⲡⲁⲛⲧⲁⲉⲡⲡⲉⲧⲟⲩⲁⲁⲃⲁⲡⲁⲡⲁϩⲁⲙ·ⲡⲉϫⲁϥⲛⲁⲓϫⲉⲁⲕϫⲓⲥⲙⲟⲩⲛⲧⲟⲟⲧϥⲙⲡⲉⲥⲩⲛⲑⲓⲟⲥϣⲏⲙ·
ⲡⲉϫⲁⲓⲛⲁϥϫⲉⲉϩⲉⲡⲁⲉⲓⲱⲧⲁⲗⲗⲁⲛⲧⲟⲕⲡⲉⲡⲉⲧⲟⲩⲁⲁⲃ·
ⲁϥⲟⲩⲱϣⲃⲇⲉⲛⲁⲓϫⲉⲛⲁⲙⲉⲟⲩⲡⲉⲧⲟⲩⲁⲁⲃ·ⲡⲉⲡⲉⲥⲩⲛⲑⲓⲟⲥϣⲏⲙ⁛ⲁⲩⲱⲁⲕϫⲓⲟⲩⲛⲟϭⲛⲥⲙⲟⲩⲉϣⲱⲡⲉⲁⲕⲁⲡⲁⲛⲧⲁⲉⲣⲟϥ·ⲛⲉⲧⲁⲣⲭⲏⲅⲁⲣⲧⲉ·ⲛⲧⲁϥϣⲗⲏⲗⲁⲧϣⲱⲧⲉⲙⲟⲩϩⲙⲙⲟⲟⲩ
ⲡⲉϫⲁϥⲛⲁⲛϫⲉⲁⲥϣⲱⲡⲉⲛⲟⲩϩⲟⲟⲩⲁⲛⲛⲁⲩⲉⲩⲕⲱϩⲧⲉϥⲙⲟⲩϩϩⲙⲡⲉϥⲏⲓⲁⲛϣⲁϫⲉⲙⲛⲛⲉⲛⲉⲣⲏⲩϫⲉⲁⲣⲁⲉⲣⲉⲡⲉⲥⲩⲛⲑⲓⲟⲥϣⲏⲙϫⲉⲣⲉⲕⲱϩⲧⲉⲟⲩⲛⲛⲉⲓⲟⲩⲛⲟⲟⲩⲉ·
ⲁⲩⲧⲁⲗⲟⲇⲉⲉϩⲣⲁⲓⲁⲩϭⲱϣⲧⲉϫⲱϥϩⲛⲧϫⲟ·ⲁⲩⲑⲉⲱⲣⲉⲓⲙⲙⲟϥ·ⲉϥⲁϩⲉⲣⲁⲧϥⲉϥϣⲗⲏⲗⲉⲣⲉⲛⲉϥϭⲓϫⲡⲟⲣϣⲉⲃⲟⲗⲉϩⲣⲁⲓⲉⲧⲡⲉ⁛—ⲉⲣⲉⲡⲉϥⲙⲏⲧⲛⲧⲏⲏⲃⲉⲟⲛⲧϩⲉⲙⲙⲏⲧⲉⲛⲗⲁⲙⲡⲁⲥ·ⲛⲕⲱϩⲧⲉⲩⲣⲟⲩⲟⲉⲓⲛⲉⲙⲁⲧⲉ⁛—
ⲛⲧⲉⲣⲉⲡⲛⲟⲩⲧⲉⲇⲉⲟⲛⲧⲁϩⲙⲉϥⲉⲧⲉⲓⲭⲓⲣⲟⲇⲟⲛⲓⲁⲛⲧⲙⲛⲧⲟⲩⲏⲏⲃ·ⲧⲁⲓⲉⲧⲉϥⲙⲡϣⲁⲙⲙⲟⲥ·ⲉⲃⲟⲗϫⲉϥⲙⲉⲙⲡⲉⲥϭⲣⲁϩⲧⲁϥⲃⲱⲕⲁϥϩⲟⲡϥ·
ⲛⲧⲉⲣⲉⲡⲉⲕⲗⲏⲣⲟⲥⲇⲉⲙⲙⲁⲓⲛⲟⲩⲧⲉϣⲓⲛⲉⲛⲥⲱϥⲉⲧⲣⲉϥⲑⲙⲥⲟⲟϥⲉϫⲙⲡⲉⲑⲣⲟⲛⲟⲥ·ⲛⲧⲁⲣⲭⲩⲉⲣⲟⲥⲩⲛⲏ·ⲧⲁⲓⲉⲧϥⲙⲡϣⲁⲙⲙⲟⲥⲛⲁⲙⲉ·ⲁⲩϣⲓⲛⲉⲇⲉⲛⲥⲱϥ·ⲁⲩϩⲉⲉⲣⲟϥϩⲛⲙⲙⲉⲣⲟⲥⲛϫⲏⲙⲉⲉϥϩⲏⲡ·
ⲛⲧⲉⲣⲟⲩϭⲟⲡϥⲇⲉⲁϥⲱϣⲉⲃⲟⲗⲉϥⲧⲁⲩⲟⲙⲡϣⲁϫⲉⲙⲡⲛⲟϭⲓⲱⲥⲡⲁⲣⲭⲏⲉⲡⲓⲥⲕⲟⲡⲟⲥⲛⲕⲱⲥⲧⲁⲛϯⲛⲟⲩⲡⲟⲗⲓⲥ·ϫⲉⲱⲡⲉⲥϭⲣⲁϩⲧ
ⲉϯⲙⲉⲙⲙⲟϥⲛⲥⲉⲕⲱⲙⲙⲟⲓⲛϩⲏⲧϥⲁⲛ⁛—
ⲗⲟⲓⲡⲟⲛⲁⲩⲉⲓⲛⲉⲙⲡⲡⲉⲧⲟⲩⲁⲁⲃⲁⲩⲑⲙⲥⲟⲟϥⲉϫⲙⲡⲡⲉⲧⲟⲩⲁⲁⲃⲁⲩⲑⲙⲥⲟⲟϥⲉϫⲙⲡⲉⲑⲣⲟⲛⲟⲥⲛⲧⲉⲡⲓⲥⲕⲟⲡⲏ·
ⲛⲧⲁϥⲡⲱⲧⲇⲉⲁⲛⲛⲥⲁⲡⲧⲁⲉⲓⲟ·ⲁⲗⲗⲁⲛⲧⲁⲡⲧⲁⲓⲟ·ⲡⲱⲧⲛⲥⲱϥ·ⲉⲁⲛⲉⲛⲧⲁⲩϭⲟⲡϥϩⲟⲙⲟⲗⲟⲅⲉⲓⲛⲁⲛ·ϫⲉⲁϥϩⲟⲙⲟⲗⲟⲅⲉⲓⲛⲁⲛϩⲛⲧⲉϥⲧⲁⲡⲣⲟ·
ϫⲉⲛⲥⲁⲃⲏⲗϫⲉⲛⲛⲉⲓⲣⲁⲧⲥⲱⲧⲙⲛⲥⲁⲡⲉⲧⲧⲛⲛⲟⲟⲩⲙⲙⲟⲓⲉⲡⲁⲓⲉⲧⲉⲧⲛϣⲁⲛϥⲓⲛⲧⲁⲁⲡⲉϩⲓϫⲱⲓ·ⲏⲛⲧⲉⲧⲛⲛⲟϫⲧⲉⲧⲑⲁⲗⲁⲥⲥⲁⲛϯⲛⲁⲥⲱⲧⲙⲁⲛⲛⲥⲁⲧⲏⲩⲧⲛⲛⲧⲁⲕⲱⲛⲥⲱⲓⲙⲡⲉⲥϭⲣⲁϩⲧⲡⲁⲓⲉⲧⲉⲣⲉⲡⲛⲟⲩⲧⲉⲙⲉⲙⲙⲟϥ·
ⲏⲙⲡⲉⲧⲉⲧⲛⲥⲱⲧⲙⲛⲧⲱⲧⲛⲉⲡⲉⲧⲥⲏϩϩⲛⲛⲉⲯⲁⲗⲙⲟⲥ·ϫⲉⲥⲣϥⲉ·ⲛⲧⲉⲧⲛⲉⲓⲙⲉϫⲉⲁⲛⲟⲕⲡⲉⲡⲛⲟⲩⲧⲉ·
ⲁⲩⲙⲉⲕⲙⲟⲕⲟⲩⲇⲉⲙⲛⲛⲉⲩⲉⲣⲏⲩⲉⲩϫⲱⲙⲙⲟⲥ·ϫⲉⲛⲓⲙⲁⲣⲁⲡⲉⲧⲟⲩⲉϩⲥⲁϩⲛⲉⲛⲁϥⲙⲏⲟⲩⲣⲱⲙⲉⲡⲉ·
ⲁⲩϣⲟϫⲛⲉⲇⲉⲙⲛⲛⲉⲩⲉⲣⲏⲩϫⲉⲙⲁⲣⲛⲧⲁⲩⲟⲉⲡϣⲁϫⲉⲉⲡⲡⲉⲧⲟⲩⲁⲁⲃⲁⲡⲁⲕⲟⲗⲗⲟⲑⲟⲥⲟⲩⲛⲟϭⲛⲡⲣⲱⲙⲉ·ϥⲛⲁϭⲉⲗⲡⲡϣⲁϫⲉⲉⲣⲟϥ·ⲁⲩⲱϥⲛⲁϩⲡⲫⲱⲃⲉⲣⲟϥⲁⲛ·
ⲗⲟⲓⲡⲟⲛⲁⲩⲃⲱⲕϩⲁϩⲧⲙⲡⲡⲉⲧⲟⲩⲁⲁⲃⲁⲡⲁⲕⲟⲗⲗⲟⲑⲟⲥ·ⲡⲉϫⲁⲩⲛⲁϥϫⲉⲡⲉⲛⲉⲓⲱⲧⲛⲧⲉⲣⲛϫⲓⲙⲡⲉⲛⲉⲓⲱⲧⲁⲡⲁⲡⲉⲥⲩⲛⲑⲓⲟⲥ·ϫⲉⲛⲛⲁⲭⲉⲓⲣⲟⲇⲟⲛⲉⲓⲙⲙⲟϥⲛⲉⲡⲓⲥⲕⲟⲡⲟⲥ·ⲙⲡⲉϥⲟⲩⲱϣⲉⲕⲁⲧⲉⲭⲉⲉⲉⲓⲣⲉⲛⲧⲗⲩⲧⲟⲩⲣⲅⲓⲁⲛⲧⲁⲩⲧⲁⲛϩⲟⲩⲧϥⲉⲣⲟⲥ·
ⲉⲓⲥⲟⲩⲙⲏⲏϣⲉⲛϩⲟⲟⲩⲉⲛϯⲟⲩⲟⲓⲛⲥⲱϥϣⲁⲛⲧⲛϩⲉⲉⲣⲟϥ·ϩⲛⲙⲙⲉⲣⲟⲥⲛⲧϫⲉⲙⲉ·
ⲛⲧⲉⲣϥⲁⲙⲁϩⲧⲉⲇⲉⲙⲙⲟϥ·ⲁϥⲟⲩⲱϣⲉⲡⲁⲣⲁⲓⲧⲉⲓⲛⲧⲉϥⲧⲁⲝⲓⲥ·
ⲙⲛⲛⲥⲱⲥⲡⲉϫⲁϥϫⲉⲛⲥⲁⲃⲏⲗϫⲉⲛⲛⲉⲓⲣⲁⲧⲥⲱⲧⲙⲛⲥⲁⲡⲉⲧⲧⲛⲛⲟⲟⲩⲙⲙⲟⲓ·ⲉⲡⲉⲓⲕⲁⲛⲉⲧⲉⲧⲛϣⲁⲛϥⲓⲛⲧⲁⲁⲡⲉ·ϩⲓϫⲱⲓⲛϯⲛⲁⲥⲱⲧⲙⲁⲛⲛⲥⲱⲧⲛ⁛—
ⲧⲛⲡⲁⲣⲁⲕⲁⲗⲉⲓϭⲉⲛⲧⲉⲕⲙⲛⲧⲡⲉⲧⲟⲩⲁⲁⲃ·ⲥⲩⲛⲧⲉⲭⲉⲓⲛⲙⲙⲁϥⲛⲟⲩϩⲟⲟⲩⲛⲅϫⲛⲟⲩϥⲟⲩⲧⲱⲕⲟⲩⲧⲱϥϫⲉⲛⲓⲙⲡⲉⲛⲧⲁϥⲧⲛⲛⲟⲟⲩⲕ·
ⲙⲙⲟⲛⲟⲩϣⲡⲏⲣⲉⲡⲉⲡⲉⲓϩⲱⲃ·
ⲡⲡⲉⲧⲟⲩⲁⲁⲃⲇⲉⲁⲡⲁⲕⲟⲗⲗⲟⲑⲟⲥ·ⲁϥϫⲛⲟⲩϥ·ϫⲉⲡⲉϫⲉⲛⲉⲕⲗⲏⲣⲓⲕⲟⲥⲙⲙⲁⲓⲛⲟⲩⲧⲉ·ϫⲉⲁⲧⲉⲕⲙⲛⲧⲡⲉⲧⲟⲩⲁⲁⲃϫⲟⲟⲥϫⲉⲛⲥⲁⲃⲏⲗϫⲉⲛⲛⲉⲓⲣⲁⲧⲥⲱⲧⲙⲛⲥⲁⲡⲉⲧⲧⲛⲛⲟⲟⲩⲙⲙⲟⲓ·ⲉⲡⲉⲓⲡⲁⲟⲩⲱϣⲁⲛⲡⲉⲉⲁϩⲉⲣⲁⲧⲉⲧⲉⲓⲧⲁⲝⲓⲥⲛϯⲙⲓⲛⲉ·
ⲁⲣⲁⲛⲓⲙⲡⲉ·ⲁϥⲟⲩⲱϣⲃⲛϭⲓⲡⲡⲉⲧⲟⲩⲁⲁⲃ·ⲁⲡⲁⲡⲉⲥⲩⲛⲑⲓⲟⲥ·ϫⲉϩⲁⲧϩⲏⲉⲧⲣⲉⲡⲉⲕⲗⲏⲣⲟⲥⲉⲓⲉϩⲟⲩⲛ·ϣⲁⲧⲁⲙⲛⲧⲉⲗⲁⲭⲓⲥⲧⲟⲥ·ⲁⲓϩⲱⲣⲡⲛⲟⲩⲕⲟⲩⲓ·ⲁⲩⲥⲙⲏϣⲱⲡⲉϣⲁⲣⲟⲓ·ⲛϣⲟⲙⲛⲧⲛⲥⲟⲡ·ϫⲉⲡⲉⲥⲩⲛⲑⲓⲟⲥ·ⲡⲉⲥⲩⲛⲑⲓⲟⲥ·ⲡⲉⲥⲩⲛⲑⲓⲟⲥ·
ⲉⲓⲥⲧⲧⲁⲝⲓⲥⲛⲧⲉⲕⲕⲗⲏⲥⲓⲁ·ⲁⲩⲉⲓⲛⲥⲱⲕ·
ⲙⲡⲣⲡⲁⲣⲁⲓⲧⲉⲓⲛⲧⲧⲁⲝⲓⲥ·ⲛⲧⲁⲩⲧⲁⲛϩⲟⲩⲧⲕⲉⲣⲟⲥ·ⲛⲧⲙⲡⲁϫⲱϫⲛⲁⲡⲟⲥⲧⲟⲗⲟⲥ·ⲁⲗⲗⲁⲧⲱⲟⲩⲛⲛⲅⲟⲩⲁϩⲕⲛⲥⲱⲟⲩ·

ANNIS Metadata

Coptic_edition: Budge, 1913
annotation: Amir Zeldes, Lance Martin
attributed_author: John the Presbyter
author: unknown
collection: Oriental Manuscripts
corpus: life.pisentius
country: Egypt
document_cts_urn: urn:cts:copticLit:lives.pisentius.budge:1-31
entities: automatic
identities: checked
idno: OR. 7026 ff. 20a-41b
language: Sahidic Coptic
license: CC-BY 4.0
msItem_title: The Life of Apa Pisentius
msName: MERC.AQ
next: urn:cts:copticLit:lives.pisentius.budge:32-58
note: Coptic SCRIPTORIUM's edition includes only Budge's transcription of the manuscript. It is not a diplomatic transcription based on reading and collation of the original manuscript. The translation is Budge's with very slight modifications (e.g., numbers mistranslated.) Our origDates are taken from PAThs. Certain of the codice's page numbers repeat, proceeding from 45 to 36. The repeating numbers are marked with the '.b' suffix. In the middle of the text, they proceed from 45.b to 86.
objectType: codex

Cite this Document

When citing a corpus or document from Coptic SCRIPTORIUM, please include the relevant URN(s) (provided below) in all citations. On this site, these URNs will resolve to the latest edition of our data. We also encourage researchers to save visualizations they use, download query results from ANNIS, and save information from document metadata.

Use the following model to cite this document. Our full citation guidelines page provides more models.

First citation:

Author, Ancient title [chapter.verse if available], ed. [annotators], trans. [translation]. urn:cts:copticLit:lives.pisentius.budge:1-31. [version number], [date]. https://data.copticscriptorium.org/urn:cts:copticLit:lives.pisentius.budge:1-31.

Subsequent citations:

Author, Ancient title (abbreviated) [chapter.verse if available], urn:cts:copticLit:lives.pisentius.budge:1-31.

Document Edition: urn:cts:copticLit:lives.pisentius.budge:1-31

Work: urn:cts:copticLit:lives.pisentius

Text Group: urn:cts:copticLit:lives

The following links will direct you to the latest versions of data visualizations of the document.

Normalized Text HTML: https://data.copticscriptorium.org/urn:cts:copticLit:lives.pisentius.budge:1-31/norm/html

Analytic Visualization HTML: https://data.copticscriptorium.org/urn:cts:copticLit:lives.pisentius.budge:1-31/analytic/html

The following links will direct you to the latest versions of the data for download.

TEI XML: https://data.copticscriptorium.org/urn:cts:copticLit:lives.pisentius.budge:1-31/tei/xml

Paula XML: https://data.copticscriptorium.org/urn:cts:copticLit:lives.pisentius.budge:1-31/paula/xml

relANNIS: https://data.copticscriptorium.org/urn:cts:copticLit:lives.pisentius.budge:1-31/relannis

The following link will direct you to the latest version of the corpus available for search and querying in ANNIS:

ANNIS UI: https://data.copticscriptorium.org/urn:cts:copticLit:lives.pisentius.budge:1-31/annis